3^ Festa Sardu Ufitziale su 24 e 25 cabudanni in Bonàrcadu

Sa Festa de su Sardu Ufitziale ocannu s’at a fàghere in Bonàrcadu (Aristanis) sàbadu su 24 e domìniga su 25 de su mese de Cabudanni.

Est su fine de chida prus serente a sa Die Europea de sa limba chi est su 26 de su matessi mese, ma rùet in lunis. Sos annos colados su Coordinamentu pro su Sardu Ufitziale aiat organizadu sa matessi faina in Sèdilo (2014) e in Oschiri (2016) semper in occasione de sa Die Europea. Ambas duas cun profetu e arrènessida de pùblicu e presèntzia mediàtica.

Sa punna, comente sos annos colados, est cussa de fàghere addòbiare sos chi sunt a favore de su sardu limba ufitziale e de resonare paris pro cumprèndere istrategias e atziones pro su tempus benidore. Su giudìtziu de su CSU in contu de sa polìtica linguìstica regionale est, pro la nàrrere a s’italiana, “gravemente insufficiente”. Su movimentu linguìsticu non podet abarrare firmu.

Ocannu puru sa fòrmula binchidora de sas duas editziones coladas est cunfirmada cun s’agiudu de sa comuna de Bonàrcadu e de sòtzios regionales e de sa bidda chi ant a dare una manu de agiudu pro s’organizatzione. Su programma est galu in cotura, ma si podet antitzipare chi b’ant a èssere medas interventos e medas presentatzione de òperas e testimonias de giudu de sa polìtica linguìstica. In prus mustra de lìbros, màndigos, artes e mùsica. Invitados finas paritzos polìticos. Ma sa cosa prus importante est chi partetzipent sos militantes e sos amantiosos de sa limba sarda a prou de dare unu sinnale forte de interessu pro sa limba nostra.

S’editzione de s’annu coladu aiat bidu in duas dies prus de 400 persones presentes.   Est unu programma de manifestatziones culturales mescamente cun duos cunvegnos in sos cales s’ant a presentare libros, films, òperas de arte. Est prevèdida una bisita archeològica. Pràngiu e chena sotziale a prejos baratos. S’ant a fàghere arresonos cun polìticos de onni orientamentu e finas leturas de poesias e mùsica. S’orientamentu, comente s’ischit, est pro sa limba sarda e s’impreu ufitziale suo tràmite sa LSC. Ma sunt benebènnidos parres finas diferentes. Est prevèdida sa partetzipatzione de militantes e amantiosos de onni chirru de sa Sardigna.

Sos traballos s’ant a fàghere sàbadu a merie e domìniga a mangianu. S’at a pòdere mandigare a baratu (belle 10 èuros unu pastu) e corcare in sas istruturas alberghieras de sa bidda. Sa Die b’at finas festa in sa bidda. Est duncas s’ocasione pro disinnare unu fine de chida sulenu e galanu pro sa famìlia.

Pustis Mesu Austu su Coordinamentu pro su Sardu Ufitziale at a fàghere connòschere su programma cumpletu. Collaborant finas àteros sòtzios de interventu culturale e linguìsticu chi ant a èssere presentes sa die.

A banda s’agiudu logìsticu de su comunu sa festa est autofinantziada, duncas si calicunu cheret agiudare a manera cuncreta su CSU lu podet fàghere a manera lìbera cun traballu o ofertas. Si b’at artistas chi si cherent esibire o àteras òberas chi si bolent presentare si podet propònnere a sos organizadores.

Bos cumbenit a bos marcare sas die in s’agenda e a non leare àteros impignos pro non pèrdere un’eventu de custu livellu. Sa die, sas sorpresas de su CSU no ant a mancare de seguru.