29.08.1985 – Làconi: bator avieris mortos in sa ruta de un’aèreu istudafogu

Aèreu G222

Sa die in sa bidda de su Sartzidanu bi fiat sa festa de su Santu. Paradas, ispetàculos, mùsica sarda, cuntentesa e pellegrinos lòmpidos a Làconi pro onorare Fra Innàtziu. Su fogu però cuss’annada fiat una cosa sena frenos agiuadu dae su sicore e dae su bentu forte. Unu fronte de framas artas, mòvidu dae sos paris de Nuradda, fiat lompende a sa leada de Su Lau, in ue, colende dae sas palas de Is Forros, fiat in arriscu de intrare in Carradore, Funtana Maore e a sas primas matas de su Parcu Aymerich.
Pro sa perigulosidade de su fogu si fiat apretadu s’interventu de sos mezos militares dae chelu. Fiat arribadu luego dae Continente un’aèreu G222, nùmene in còdighe “Lupo 92” chi aiat in subra su magiore Fabrizio Tarasconi, su tenente Paolo Capodacqua, sos maresciallos Lido Luzzi e Rosario Ferrante. Totu in una, mentres protzediant sas operatziones ghetende s’abba a sas pampadas, una pesada de bentos in cuota aiat cajonadu problemas a conduire s’aèreu chi fiat rutu subra unu serragu de su monte in localidade Is Forros. Pro sos bator eroes non b’aiat istadu nudda de fàghere e sunt mortos luego totus.
Dae tando, sa bidda de Làconi ammentat cada annu, cun una tzerimònia in su logu de su disacatu, su sacrifìtziu de cuddos òmines imbiados dae s’istadu a defensare sa Sardigna dae una ferta dolorosa comente cussa de sos fogos in s’istade. A s’ammentu partzètzipant semper sas rapresentàntzias militares, polìticas e religiosas de s’ìsula paris cun sos parentes de sos avieris iscuros chi sa die ant pèrdidu sa vida. E custu si faghet cun fitianidade no in tames sa die siat semper festa manna pro totus sos biddaresos de Santu Fra Innàtziu.
A pagos metros dae ue sos bator militares sunt mortos, est istadu pesadu unu monumentu de pedra pro los regordare semper e annoare su dèpidu chi sa bidda at cun custos servidores de un’istadu paritzas bortas ausente e malu cun sa Sardigna, ma chi sa die at versadu sàmbene pro defensare sos padentes meravigiosos de su territòriu.

Làconi, tzerimonia de unos cantos annos in localidade “Is Forros”

 

 

Lassa unu cummentu

S'indiritzu email tuo no at a èssere publicadu. Is campos pedidos sunt signados *

*