27.08.1979 – Fabrizio De André e Dori Ghezzi secuestrados in domo issoro in Gaddura

27.08.1979 – Fabrizio De André e Dori Ghezzi secuestrados in domo issoro in Gaddura

Sa die Fabrizio de Andrè, cun sa cumpangia sua Dori Ghezzi, fiant in su dominàriu gadduresu de L’Agnata, in ue aiant seberadu de bìvere pro bona parte de s’annu e finas de creare una posada pro dare a mandigare e a corcare a sos furisteris chi bi capitaiant. Ma est in cudda domo etotu, su 29 de su mese de austu de su 1979, sos duos artistas nche los aiant tentos unos cantos criminales e secuestrados in monte pro unos cantos meses. Los aiant lassados petzi pustis su pagamentu de unu riscatu.
Fiat a ora de mesunote cando sos bandidos fiant intrados. Dae tando, pro bator meses, Fabrizio e Dori los aiant custrintos a bìvere cun sas cadenas comente canes, dies intreas ligados a àrbores in padentes carcos chi a su note fiant finas fritos. Sos dannàrgios, comente totus sos chi faghiant secuestros de cristianos, chircaiant de los pirmare psicologicamente e umanamente a manera chi mancu esserent proadu a si fuire. Finas si, a pustis, su matessi cantautore, aiat naradu chi a onni manera, sos bandidos sardos finat renessidos a mantènnere unu cumportamentu bastante umanu.
Los aiant lassados andare pustis chi su babbu de Fabrizio, Giuseppe, chi fiat un’industriale de grandu facoltades finantziàrias, no aiat pagadu su riscatu. Sos duos cumpàngios aiant torradu a connòschere su sabore e sa lughe de sa libertade su 21 de su mese de Nadale de su matessi annu. Paret chi su tantu pagadu pro sa liberatzione esseret de prus de 500 miliones de francos de tando.
Cun su protzessu si fiat ischida totu sa beridade. Sa ghenga fiat fata de ses orunesos, unu toscanu e tres de Pattada. Fabrizio e Dori si fiant costituidos parte tzivile contra sos mandantes ebbia: Graziano Pietro Porcu, Pietro Ghera, Salvatore Marras, Pietro Delogu e Marco Cesari, perdonende sos àteros chi, a bisu de so artistas, aiat fatu su male petzi chi fiant custrintos dae sas conditziones econòmicas feas issoro. Pro unu pastore de Pattada, chi aiat agiuadu sos bandidos, in su 1985, sos duos artistas aiant firmadu sa petitzione a su Presidente de sa Repùblica pro sa dimanda de gràtzia.
Su fatu dolorosu e feu no aiat però fatu ismenguare pro nudda s’ammiru chi su cantadore genovesu aiat pro sa Sardigna e pro sos Sardos. Dae cussa esperièntzia dolorosa fiat naschidu unu discu sena tìtulu, connotu pro sa magine de unu nativu indianu in sa coberta, in ue si faghet unu parallelu de fatu intre su pòpulu sardu e cussu peddiruja pro su fadu paris chi ant tentu de colonizatzione. In sa còllida, b’est finas sa cantzone famada “Hotel Supramonte” ispirada a sos meses de sa tentura etotu in su sartu. E in fines, De Andrè, no aiat mai cuadu su fatu chi, a bisu suo, sos sardos diant àere paradu fronte mègius a sos problemas issoro guverne-nde-si a sa sola, sena s’Itàlia.

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *