16.08.1995 – Sàmbene in Chilivani: mortos duos carabineris e unu bandidu

Su 16 de austu de su 1995, s’ammentat su massacru de Chilivani.  Sos carabineris Ciriaco Carru e  Walter Frau fiant andados a controllare una betoniera furada dae unos cantos cantos delincuentes pro fàghere un’irrobatòriu.  Ma sos bandidos lis ant isparadu e los ant mortos. S’isparatòria si fiat àpida in localidade Mesu ‘e Rios, agru de Chilivani-Otieri, e fiat mortu finas una bandidu, Sarvadore Giua. Sos carabineris aiant arrestadu custu Giua ca l’aiant agatadu a probe de su mezu chi fiat finas prenu de armas. Mentres fiant ponende sos ferros a Giua sunt arribados àteros duos bandidos, Graziano Palmas e Andrea Gusino, chi si nche sunt postos a isparare contra sos duos militare cun mitralliadores. Sos duos carabineris sunt rutos, ma in su mentres ant mortu a Giua.
Palmas, fertu dae unu corpu, e Gusinu si nche fiant fuidos cun unu camion, ma sos carabineris los aiant firmados pagu prus a dae in antis, in localidade “Padru”. Gusinu si fiat rèndidu, mentres Palmas si fiat mortu a manu sua pro non rùere in poderiu de sos militares. Posca aiant arrestadu totu sos cumponenentes de sa banda: Salvatore Sechi de Olbia, Sebastiano Demontis de Buddusò, Sebastiano Pirino de Arzachena, Cosimo Cocco de Bonarcado e Milena Ladu de Olbia.
Sa giustìtzia at semper pensadu chi, paris cun sos arrestados, chi posca sunt istados cundennados, aerent fatu parte de sa ghenga finas àteros personàgios de unu pìgiu criminale meda prus cruele e rebestu. Ma unos cantos chi fiant indagados, e chi sos carabineris aiant porrogadu, sunt mortos in su mentres, faghende ghetare sa paràula “finitia” subra custa inchesta.

Lassa unu cummentu

S'indiritzu email tuo no at a èssere publicadu. Is campos pedidos sunt signados *

*