Dae giòbia, su 14 de martzu, at a èssere in sos tzìnemas sardos pro 4 dies ebbia unu film de unu giòvanu regista sardu chi contat su mundu de sos pitzinnos. Su tìtulu cumpletu de su film est difatis “Treulababbu – Le ragioni dei bambini”.
Su film est partzidu in duos episòdios ma in ambos si chistionat de sos raportos difìtziles intre de su mundu de sos mannos e de sos pitzinnos. In sa prima parte si cheret mustrare comente sa pesadura de sos fìgios siat mègius cun sos assempros e non cun sa tzarra, mentres in sa de duas partes sa punna est de afirmare chi sa fantasia est de importu mannu pro sa crèschida e sa personalidade de sos pitzinnos.
Unu cumbidu a andare a bìdere su film est arribadu dae Pepe Coròngiu, amigu de su regista Simone Contu: “Una manera pro agiuare unu regista atrividu militante de sa limba sarda e pro favorèssere s’isparghinamentu de sa limba nostra in s’indùstria tzinematogràfica.”
Pro nd’ischire de prus podides bisitare su situ internet: http://www.treulababbu.it/