Su sardu: limba de cada die


Sardegna Quotidiano
Cun una locandina provocatòria e sa frase irònica “Imprea sa Limba”, unu cursu nou de sardu pro apassionados de limba e cultura natzionale sarda at a cumintzare Lunis 21 de Onniasantu in sa ruga Tèmpiu 27 (sede de ProgReS Progetu Repùblica) a is 6 e mesu de merie.

Giai in prus de 7′ at imbiadu s’adesione issoro, unu datu chi cunfortat e bonu pro is organizadores, e chi cunfirmat s’interessu semper prus mannu de is giòvanos pro custas chistiones. Su curadore de su cursu, Massimeddu Cireddu, est unu ingegneri informàticu de 26 annos, chi at traballadu a sa bortadura de programmas informàticos e a su curretore ortogràficu pro su sardu «B’est sa netzessidade de intrare cun s’impreu pràticu de sa limba sarda in totus is cuntestos de sa vida de onni die, dae su curriculum a s’iscritura creativa, fintzas a sa retzitatzione».

Su cursu, narat, at a èssere de carchi mese, «non tenimus galu una data de agabbu. Cada letzione at a durare 2 oras, amus a chistionare fintzas de grammàtica, mancari su prus at a èssere a pitzus de s’impreu pràticu de sa limba». «Is letziones ant a tènnere cada chida un’istràngiu» ispricat Cireddu. Sa lista est vària. «At a èssere una sorpresa. Ant a èssere professionistas connotos» sighit «pro nàrrere b’ant a èssere iscritores, cantantes, etc.» A beru un’immersione in sa limba sarda chi at a permìtere a is pertetzipantes de ischire cosas e faeddos noos, e prus che totu a ddos pònnere in pràtica.

«Duncas, impreamus sa limba nostra cada die, e proite nono ispassiende·si» serrat Cireddu. Is iscritziones a su cursu sunt galu apertas e est possìbile a si registrare in su giassu www.impreasalimba.net