S’Ufìtziu de sa Limba Sarda de sa Provìntzia de Terranoa Tèmpiu paris cun s’Assessoradu a sa Cultura de sa Comuna de Tèmpiu, sas editziones Papiros e sa cooperativa Athena organizat pro giòvia 20 de santugaine a sas 15 de merie in su teatru de su Carmene in Tèmpiu sa presentatzione de su libru sardu-gadduresu Lu mastru banditu/ Su mastru bandidu de s’iscritore tempiesu Franco Fresi.
S’initziativa chi faghet parte de sa rassinna ligghjmu in gadduresu/leghimus in sardu pertocat sas atividades de promozione e de valorizatzione de su sardu e de su gadduresu e cheret mustrare comente s’impreu de una limba minoritària, comente su sardu o su gadduresu podet èssere “normale” non setzi in àmbitu familiare ma finas pro sa presentatzione de unu libru o de una pellìcula, o pro sas iscritas de impreu pùblicu comente locandinas e avisos, publitzidade, giornales o in àteros contestos formales.
In un’època in ue sas culturas e sas limbas minoritàrias arriscant de s’estìnguere gasi comente at denuntziadu carchi annu a como su Diretore Generale de s’Unesco Koichiro Matsuura, sas initziativas comente custas chi mirant a sa tutela de sas limbas minoritàrias sunt una manera importante pro animare sa diversidade linguìstica e s’educatzione
multilinguìstica.
A pustis de sos saludos de s’Assessore a sa Cultura de sa Comuna de Tèmpiu Roberto Cossu, s’initziativa at a èssere coordinada dae sa responsàbile de s’Ufìtziu Linguìsticu Provintziale Juvanna Tuffu e at a èssere presentada dae s’autore Franco Fresi e dae s’editore Diegu Corràine.
S’initziativa, in ue ant a partetzipare sos pitzinnos de s’iscola primària, at a èssere animada dae sas atoras Clara Farina e Mariantonietta Pirrigheddu chi ant a lèghere su contu in sardu e in gadduresu.
Sas initziativas imbenientes de sa rassinna ligghjmu in gadduresu/leghimus in sardu sunt prevìdidas pro su mese de santandria e sunt custas:
- su 3 in Locusantu,
- su 10 Terranoa
- su 11 in Badesi
- su 18 in Lungone