Su 'diversivu' de sa Carta Europea, mentres Casteddu ponet duos miliones

Su 'diversivu' de sa Carta Europea, mentres Casteddu ponet duos miliones

de Giuseppe Pepe Coròngiu

 

Marco Murgia, cussigeri comunale de Casteddu
Marco Murgia, cussigeri comunale de Casteddu

Sa nova l’at dada su cussigeri comunale de su PD Marco Murgia dae su perfilu suo de Facebook. S’amministratzione comunale de sa capitale at istantziadu 2 miliones de èuros pro sas iscolas maternas pùblicas de sa tzitade chi podent èssere impreados finas pro sa limba sarda. Est una fatia de importu finas ca s’amministratzione de Casteddu faghet in fines calicuna cosa de cuncretu barighende discussiones inùtiles e folclorismos perìgulosos. Como tocat a averguare chi sos ufìtzios iscant esatamente indiritzare custu dinare a sa limba e su dinare non si perdat in bandos lascos o fatos male.

Su meressimentu mannu est pròpiu de Marco Murgia, una pessone de gabale, chi mudu mudu at semper traballadu bene in intro de sa comuna de Casteddu in ue b’at una situatzione difítzile meda pro su sardu. Murgia est s’esempru de comente diat dèpere èssere unu polìticu pro sa limba sarda:  cumpetente, ùmile, cuncretu. Est coerente finas in su privadu: faeddat bene su sardu e pesat is fìgios in custa limba finas in una realidade difìtzile comente Casteddu.

Totu a s’imbesse de unu chi finas a como at fatu petzi dannu pro sa limba sarda comente Paolo Zedda. Sinniesu, dentista, Est unu de cuddos chi in Regione s’est autonominadu espertu chi diat dèpere sighire sa chistione de sa polìtica linguìstica. Sa beridade est però chi est semper prus in dificultade cun sos amigos suos.

Sende chi finas a como non sunt resessidos galu a fàghere nudda de cuncretu ant pensadu de fàghere unu bellu cunvegnu pro prenare su bòidu. Paris cun sa Fondazione Sardinia ant aparitzadu pro custu merie un’addòviu in su palàtziu règiu de Casteddu pro sa chistione de sa ratìfica mancada de sa Carta Europea dae banda de su Parlamentu italianu.

E ite mègius de una polèmica contra a sos italianos malos pro cuare su fatu chi in Sardigna sa classe dirigente no est faghende nudda pro sa limba? Chi at segadu totu sos finantziamentos?  Chi non tenet ideas si non betzas e copiadas? S’argumentu de sa Carta andat bene ca cunsentit de fàghere sos barrosos contra a Roma, ischende chi però nemos in su Parlamentu los ascurtat. E ischende chi finas in sa majoria de su guvernu regionale ant innimigos mannos.

Paolo Zedda, cussigeri regionale de Rossomori, est su promotore de custa faina discussionista e finas de una motzione chi diat dèpere andare a su votu in Cussìgiu pro “custrìnghere” su Parlamentu italianu a votare sa Carta. Est una trassa inùtile e finas provocatòria, ca non serbit a nudda si non a leare carchi tìtulu in sos giornales e a fàghere finta chi ses faghende carchi cosa. No est mancu originale ca su Cussìgiu l’aiat giai fata 2 annos como sena chi peruna fògia s’esseret trèmida in Roma. Duncas Zedda sighit a istròchere ideas de àteros polìticos sena mancu pantasia meda.

Una polìtica chi cheret fàghere carchi cosa pro sa limba depet tènnere petzi duas punnas: modificare s’istatutu ispetziale e in su mentres pònnere dinare pro initziativas linguìsticas cun una limba normale standard.

Zedda imbetzes, chi benit dae su mundu folclorìsticu essende unu cantadore semidiletante,  est mescamente su babbu de sa proposta de isperrare su sardu in duas: logudoresu e campidanesu. Una proposta chi at firmadu paris cun su linguista Blasco Ferrer e chi at partzidu pro annos e annos su mundu de sa limba e cajonadu grandu dificultade. Issu at gherradu meda contra s’unidade de su sardu cun positziones pùblicas e artìculos in giornale.

Como si presentat comente moderadu, santu e illuminadu, paladinu de s’unidade sos sardos contra a Roma. Ma chie bi credet? Podet propònnere s’unidade unu chi s’est apiculadu cun sa bandera de sa divisione? Ma sa cosa prus fea est chi sa proposta sua negat s’esistèntzia de su sardu unitàriu pro avantzare s’idea de duas limbas sardas. Cosa chi no est cumpatìbile cun sa lìtera e s’ispìritu de sa Carta Europea. Una idea ridìcula e dannàrgia.

Ma a beru pensamus chi gente gasi potzat èssere credìbile cun su Parlamentu italianu e cun s’Unione Europea? Chi potzat defensare sa limba sarda? Mah….?! E de Zedda nd’amus a torrare a faeddare. Pro como nos godimus custa bella era de discussionismu.

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *