S’Istadu discrìminat sa limba sarda e non rispetat sos tratados internatzionales chi at firmadu? Sa Repùblica Italiana arriscat de si leare un’amonestu pro more de sas denùntzias de sos ativistas sardos?
Sos “ispetores” de su Cussìgiu de Europa, in bisita in Roma in custas dies pro intèndere su parre de sos rapresentantes de sas minorias linguìsticas, cherent acrarire sas cosas. Intesas sas acusas espressadas dae Giuseppe Coròngiu (giai diretore “istòricu” de s’ufìtziu limba sarda de sa Regione e oe unu de sos animadores de su Coordinamentu de su Sardu Ufitziale) in s’addòbiu fatu eris in Palatzu Ferrajoli, in pratza Colonna a de in antis a sas ventanas de Palatzu Chigi, ant detzisu de sighire a indagare.
Su comitadu de espertos, sende chi su chi s’est naradu est partu bene argumentadu, at dadu incarrigu a su CSU de presentare intro de su mese de Cabudanni una relatzione iscrita subra totu sas fartas e sas mancàntzias de Roma in contu a sa limba sarda in sos ùrtimos deghe annos.
A parre de Coròngiu difatis s’Istadu, cando at imbiadu sas relatas obligatòrias a su Cussìgiu de Europa, at contadu fàulas pintende a s’Europa una realidade galana in contu de limbas regionales chi imbetzes no esistit. S’Istadu diat àere violadu in particulare sa Cunventzione Cuadru de Protetzione de sas minorias natzionales de su 1998 in contu de temas chi pertocant sos deretos tziviles collegados a sa limba sarda. Ma finas sa toponomàstica bilingue, s’impreu in s’amministratzione pùblica, su refudu de sa RAI a trasmìtere in sardu, sos finantziamentos de sa lege 482/99 semper prus ismenguados.
<Lègiu meda e ipòcrita est s’isbarramentu de cumpetèntzias in contu de insignamentu de su sardu in iscola – at naradu Coròngiu – chi custringhet sa Regione a fàghere estremagiogos giurìdicos a fines de assigurare calicuna ora de sardu cun insignantes esternos>.
Finas Carlo Sechi, chi at rapresentadu sa minoria catalana, s’est mustradu de acordu cun custas positziones narende chi finas pro su catalanu in s’Alighera sa situatzione est sa matessi.
A dae in antis de su comitadu de “ispetores” europeos (cumpostu dae da Krzysztof Zyman, Reinis Aboltinis, Craig Oliphant e Carmen Santiago-Reyes), in una die prena de addòbios, istùdios e traballos fungudos, si sunt presentadas finas sas àteras minorias italianas intro sas cales sos islovenos, sos otzitanos, sos croatos, sos tedescòfonos e sos albanesos. Bi fiat finas su presidente natzionale de su CONFEMILI (Comitato Nazionale Federativo Minoranze Linguistiche) Domenico Morelli.
Su comitadu consultivo de sos ispetores intro de su mese de santugaine at a dèpere detzìdere ite positzione leare cun s’Itàlia. Su documentu de opinione suo at a èssere averguadu dae sas autoridades de su Cussìgiu de Europa pro iscrìere un’amonestu ufitziale. Meda at a dipèndere dae ite at a pònnere in sa relatzione sua su CSU.
Rapresentanos tue su Maaaa…chi l’ischis fagher meda mendzus de cussos …chi ant postu a nos gubernare…