Regione: pro sa limba petzi su 0,025% de totu su bilantzu

Regione: pro sa limba petzi  su 0,025% de totu su bilantzu

pigliaru_home1702

 

Est deludente sa finantziària regionale pro sos istantziamentos linguìsticos. Pagu prus o mancu 2 miliones de èuros cherfende contare finas sa Die de sa Sardigna chi però no est propriamente unu gastu linguìsticu.

A pustis de sas chèscias e polèmicas de s’annu coladu, si isetaiat una torrada e una revesa. Finas ca personàgios, grupos e partidos polìticos de sa majoria de Guvernu si fiant impignados a agatare unu mèdiu pro torrare a pònnere su dinare. Ma a sa fine de sos contos s’incùngia est sa chi est.

Petzi 900 mìgia èuros pro su sardu veiculare in iscola, 500 mìgia pro integratziones a sos ufìtzios de sa limba, 100 mìgia pro trasmissiones radiofònicas, 60 mìgia pro identidade e folclore cun s’Isre, 40 mìgia pro su festival Suns, 250 mìgia pro s’ufìtziu regionale e 200 o 300 pro sa Die de sa Sardigna.

Sunt belle 2.000.000 de éuros chi si li faghimus sa mesura cun sos 7,9 miliardos totales de su bilantzu essit sa pertzentuale de su 0,025% e àteros detzimales chi rapresentat finas simbolicamente cantu  contat sa limba nostra pro sa classe dirigente sarda e pro sa giunta de sos professores.

Ma resonende resonende agatamus chi sa cosa est posta pejus puru. Difatis, sa promissa pro su sardu veiculare in iscola fiat de 3.000.000 de èuros e in tamen bi nd’at petzi 900.000. Ma si pensamus chi 450 mìgia nd’ant truncadu a sas iscolas in s’assestamentu a sa fine de su 2014 su tantu netu de su 2015 est prus o mancu de 500 mìgia èuros. Perunu avantzamentu tando (cun su fatu grae chi su sardu a livellu curricolare in iscola ocannu non b’est pro curpa de sas mutzaduras de s’annu coladu).

Cussos 500 mìgia de integratziones a sos ufìtzios sunt sa matessi summa de àteros annos, ma no est prevèdidu su triènniu (duncas s’annu chi benit si torrat a cuntratare) e andant a paregiare cussos de sa matessi tzifra, semper 500, chi sos professores ant truncadu in su 2014. Duncas finas inoghe perunu avantzamentu, si in casu unu parègiu (ma sos de su 2014 sunt pèrdidos).

Sos 250 mìgia pro s’ufìtziu regionale sunt cuddos de s’annu coladu contabilizados ocannu. B’at marcados in intrada finas 600 mìgia èuro de su Ministeru, ma non fiant 465.000 in su decretu pro ocannu?

Dinare beru est cussu pro sas trasmissiones radiofònicas, pro s’Isre (poesia  improvisada?) e su festival Suns de sa cantzone in limba de minoria. Ma custos ùrtimos chentu nde los ant leados a s’iscola chi in unu primu tèmpus depiat èssere de unu milione tundu tundu. Duncas, finas sa prosopopea chi tocat a puntare totu a s’iscola, cando b’at ‘urgèntzias’, a cantu paret non balet prus.

Duncas, in s’isetu de cunfirmare mègius custas tzifras cando sa finantziària at a èssere pùblica cun sos allegados tècnicos (ma si càmbiat carchi nùmeru sa morale no at a cambiare meda) si pòdet comintzare a resonare de ischitimentu.

Paret chi s’aficu de sa giunta acadèmica pro sa polìtica linguìstica non siat crèschidu meda finas cun s’ispinta de unos cantos polìticos. Naramus chi si sunt otentas prus o mancu sas summas chi finas a su 2013 si oteniant ‘d’ufficio’ cun sas simples rechestas de su servìtziu limba sarda.

Sinnale de debilesa manna, intro sa majoria de guvernu, dae banda de sos polìticos chi si sunt presentados comente ‘paladinos’ de sa limba. Sas cosas sunt duas: o non gherrant e faghent sa finta o non lis ponent mente. No s’ischit ite est pejus.

E abarrat su pecadu originale de una Giunta chi s’est permìtida de presentare a su Cussìgiu una proposta a zero èuros (e sena Die de sa Sardigna) chi nessi l’ant agigu currègida. Ma a si podet?

Como, una Regione chi gastat petzi su 0,025% de su bilantzu suo pro sa limba natzionale, podet èssere credìbile cando si chèsciat pro fàghere aproare sa Carta Europea o cando si presentat a sas àteras minorias europeas narende chi su sardu est una limba?

Paret, a dolu mannu, chi sas àteras minorias las faghimus rìere meda e chi sa cundenna nostra at a èssere de fàghere in custos annos meda folclore e ‘dialetto’ (varianti) suta sa bandera retòrica de una limba morende.si.nche e de sos paladinos suos chi non contant nudda.

 

Dir.

Leave a comment

1 Comment

  1. su chi cherjo narrer…..chi su cussizu rezonale s’istudiet sa limba e chi cando faedhan cambien rezistru…chi faedhen sa limba sarda…gai e solu gai poten dare fortza a sa limba..si intenden a issos potet esser chi sos zovanos chi an picatu s’italianu dien valore a sa limba.e gai la potet faedhare vintzas su Papa..

Send a Comment

S'indiritzu email tuo no at a èssere publicadu. Is campos pedidos sunt signados *