Regione: dinare a muntone pro s'universidade, nudda pro sa limba

Regione: dinare a muntone pro s'universidade, nudda pro sa limba

Redatzione ricchezza-poverta

Unu muntone de dinare pro sos ateneos, nudda pro sa limba sarda. Est custa sa manera de su guvernu regionale nou de si cumportare in argumentos culturales. Finas a pagas dies a como fiat petzi una timoria, dae como est divènnida una realidade. Bastat a lèghere sas ùrtimas delìberas de sa Giunta ghiada dae Frantziscu Pìgliaru, ex pro retore de s’universidade de Casteddu,  pro cumprèndere cales sunt sos sèberos e sos inditos pro sa polìtica culturale chi s’ant a isboligare in Sardigna in custos annos.

 

Cun sa delìbera n° 18/7de su 20 de maju ùrtimu est craru meda in ue in sa sa Regione colat su dinare e a in ue andat. Cun su documentu difatis si apostìvigant normas de sa lege n°26/1997 chi regulant sos raportos intre ateneos e istitutzione regionale. Est de badas a nàrrere chi sa Regione autònoma non faghet àteru chi versare dinare in sas càscias universitàrias chi sunt giai prenadas dae s’istadu. Si leat atu de sa relatzione in sa cale, cun detzisiones finas pigadas annos a como, si detèrminat su tantu chi depet èssere rendicontadu. S’importu de licuidare est de 23 miliones de èuros pro Casteddu e 29 miliones de èuros pro Tàtari. Summas chi de seguru ant a otènnere una via preferentziale in intro de su Patu de Istabilidade prus de àteros setores chi duncas ant a èssere isvantagiados.

 

Interventu custu chi sighit cussu giai annuntziadu carchi die a como pro 223 miliones de èuros chi ant a tucare a sas càscias de sos ateneos. Difatis cun sa firma de un’Acordu de Programma Cuadru intre sos retores Mastino e Melis e su Presidente de sa Regione, sa summa importante meda est istada assegurada a sas universidades. Pro fàghere ite? Annoamentu de s’Acadèmia de sas bellas artes, Ersu, Campus Universitàriu in Tàtari e Casteddu, ricualificatzione de sas Casa de lo Studente esistentes e de sas mensas. Sos capìtulos e sos argumentos non mancat.

 

Su chi mancat est imbetzes un’interventu e un’impitzu pro sos àteros setores culturales, intre sos cales cussu de sa limba. A su chi si intendet in arruga de Trieste su dinare chi sa giunta pretzedente aiat investidu meda in polìtica linguìstica at a èssere truncadu e minimadu meda. In sos livellos de su Patu de Istabilidade a sa limba no est istada dada una prioridade arta, ma antzis est a sos ùrtimos postos. Custu bolet nàrrere chi pro ocannu si podet arriascare finas de non gastare mancu un’èuro pro sa polìtica linguistica e mancu pro aviare sos pagamentos.

 

Ateru che emendamentos a sa LSC, forsis non s’est cumpresu chi sa prioridade de sa polìtica linguìstica como est sa supravivèntzia.

 

 

http://www.regione.sardegna.it/documenti/1_274_20140521105917.pdf

 

http://www.regione.sardegna.it/documenti/1_274_20140521105852.pdf

 

 

http://www.sardegnaoggi.it/Politica/2014-05-09/25243/Universita_su_Cagliari_e_Sassari_investimenti_da_220_milioni.html