RAI e limba: narcolessia linguìstica de sa Giunta Pigliaru

RAI e limba: narcolessia linguìstica de sa Giunta Pigliaru

– CSU, comunicadu –

rai regione sardegna

Sa Giunta Pìgliaru est assente de su totu in sa chistione limba sarda. Lu narat su Coordinamentu pro su Sardu Ufitziale, cun riferimentu particulare a sa chistione de sa mancàntzia de presèntzia in sa Rai de s’idioma istòricu de sa Sardigna .

A pàrrere de s’assòtziu chi ponet in pare espertos e ativistas de sa polìtica linguìstica, dae semper crìticu meda cun sa giunta regionale atuale, in duos annos e mesu s’esecutivu ghiadu dae su professore tataresu, nointames totu sas promissas chi at fatu, no ha galu postu manu a sa chistione de sa presèntzia de su sardu in sa programatzione RAI.

Una norma de sa lege 482/99 previdet chi sa Rai devet fàghere trasmissiones in limba sarda gastende dinare suo, ma in su Cuntratu de Servìtziu chi règulat sos raportos intre s’emitente radiotelevisiva pùblica, custu no l’ant galu retzepidu. Sa Giunta Soru, in su 2009, fiat resessida a otènnere su resurtadu, istòricu mancari partziale, de fàghere intrare sa limba sarda in sa programatzione regionale radiofònica, mancari gastende dinare regionale (unos 200.000 èuros a s’annu). Custa detzisione l’aiant torrada a leare in totu sos chimbe annos de su guvernu Cappellacci. Cando est intrada, in su mese de freàrgiu de su 2014, sa giunta de sos acadèmicos, custa posta l’ant segada prus de una bia in su bilàntziu; pustis l’ant torrada a pònnere, ma no ant gastadu nudda. In pagas allegas, no ant postu mente a sa voluntade de su Cussìgiu Regionale.

In s’ìnteri, nointames sas asseguratziones de unos cantos parlamentares, no ant cumintzadu peruna vertèntzia cun Roma pro su reconnoschimentu de su deretu de sa limba sarda a èssere presente in sa programatzione de sa Rai.

Sas ainas normativas chi si podent impitare (nointames su votu contràriu, un’annu a como, de sos parlamentares sardos a sa limba issoro etotu) sunt s’artìculu 12 de sa lege 482/99, chi narat, in su comma 1, chi “…in sa cunventzione intre su Ministèriu de sas comunicatziones e sa sotziedade cuntzessionària de su servìtziu pùblicu radiotelevisivu e in su cuntratu de servìtziu cunsighente, sunt asseguradas cunditziones pro sa tutela de sas minorias linguìsticas in sas zonas de apartenèntzia..”; e in su comma 2, chi narat chi “…(…) sas regiones interessadas podent fintzas istipulare cunventziones apòsitas cun sa sotziedade cuntzessionària de su servìtziu pùblicu radiotelevisivu pro trasmissiones giornalìsticas o programas in sas limbas ammissas a tutela, in intro de sas programatziones radiofònicas e televisivas regionales de sa sotziedade cuntzessionària matessi ; pro sas matessi finalidades sas regiones podent istipulare acordos apòsitos cun emitentes locales…(..).

Si podet fàghere bàlere fintzas su chi narat s’artìculu 11 de su DPR 341 de su 2001 in ue si narat chi “…(..)…in intro de sas finalidades de s’artìculu 12 de sa lege, sa cunventzione intre su Ministèriu de sas comunicatziones e sa sotziedade cuntzessionària de su servìtziu pùblicu radiotelevisivu, e su cuntratu de servìtziu cunsighente, assebertant, de preferèntzia in su territòriu de apartenèntzia de cada minoria, sa sede de sa sotziedade matessi chi l’ant atribuidu sa cumpetèntzia subra de sas atividades de tutela de sa minoria, e fintzas su cuntenutu mìnimu de sa tutela, cun sa previsione de s’atuatzione, pro cada limba minoritària, de una de sas mesuras ogetu de sas previsiones de s’artìculu 11, comma 1, lìtera a) de sa Carta europea de sas limbas regionales e minoritàrias”…(…).

Su CSU, un’annu a como, s’in cras de sas cuntierras inùtiles pro unu votu negativu presuntu de unos cantos parlamentares sardos, aiat iscritu a su presidente Pìgliaru, chi si fiat chessiadu paris cun sa collega de giunta Firino pro sos “discùidos romanos”, pedende de perorare sa càusa de su sardu in sas cuntratatziones de su Patu de sa Sardigna.

Ma de sa rechesta de su CSU a su presidente Pìgliaru, a dolu mannu, non nd’ant tentu contu; in s’ìnteri semus andende chirru a iscadèntzias crìticas: intro de nadale ant a fàghere sa cuntzessione de Istadu a sa Rai, e in sos primos meses de su 2017 su parlamentu at a dèvere approvare e ratificare su Cuntratu de Servìtziu, documentu chi règulat sos raportos intre s’emitente televisiva e su guvernu. Si s’òbligu de fàghere trasmissiones in sardu no intrat in custu protzessu giurìdicu-parlamentare, subra de su sardu in sa Rai ant a nàrrere una paràula tumbale pro paritzos annos.

Sa sede Rai de Bozen-Bolzano
Sa sede Rai de Bozen-Bolzano

Sunt custos duos sos apuntamentos in ue sa Giunta Regionale e sos parlamentares sardos, in sos meses imbenientes, ant a dèvere mustrare sa fortza issoro e s’impinnu issoro pro sa limba nostra. Su Coordinamentu pro su Sardu Ufitziale pedit chi s’istadu de narcolessia linguìstica chi nde sufrit sa Giunta Pìgliaru si podat arressare nessi in custa ocasione chi su Guvernu Renzi podet mustrare cantu rispetat sas autonomias ispetziales e culturales comente sa de sa Sardigna e sas limbas minoritàrias presentes in su territòriu italianu, tenende contu de sos printzìpios de cunvivèntzia europea santzionados dae sa Carta Europea de sas Limbas e dae sa Cunventzione Cuadru de Protetzione de sas Minorias Natzionales.

Firmadu Assemblea Diretiva CSU

Leave a comment

1 Comment

  1. Sa narcolessia est una patologia neurològica, una maladia chi non si nde connoschent sas càusas; chie la tenet no est culpàbile de la tènnere e chircat de si curare. Sa giunta Pigliaru tenet sos matessi sìntomas de sa narcolessia a pitzu de sa limba sarda (e non solu), ma sas càusas sunt àteras, diferentes e connotas. Si tratat de una maladia, o mègius de una sìndrome connota comente “Sìndrome de su colonizadu”, descrita dae unu psichiatra de sa Martinica frantzesa, Franz Fanon.

Send a Comment

S'indiritzu email tuo no at a èssere publicadu. Is campos pedidos sunt signados *