«In cuor mio continuo a ritenere che, pur tra le legittime e sostanziali differenze, le posizioni di Giuseppe Corongiu, DiegoCorraine, Roberto Bolognesi, Paolo Zedda, Amos Cardia, Alexandra Porcu, Alessandro Mongili, Oreste Pili e di tutti gli altri militanti della lingua, rientrino tutte in uno stesso identico schieramento che io vedo opposto a quello di chi, più o meno apertamente, non crede invece nella lingua sarda. È in un momento come questo, in cui l’amministrazione regionale cerca disperatamente di prendere tempo, che bisogna abbassare i toni trovare dei punti di sintesi che mettano la politica in un angolo».
Vito Biolchini nos ponet in is cunditziones de aprofundire mègius is chistiones terminològicas chi sunt in intro de sa dibata: polìtica, movimentu linguìsticu e àteras. Deo, in coro meu, penso chi cale si siat militante pro sa limba sarda – sena cunsiderare is positziones suas in pitzu de una o duas normas – faghet parte de su movimentu linguìsticu.
Che a su movimentu operaju in ue amus àpidu e amus diferentes tendèntzias polìticas e sindicales, inoghe amus diferentes bandas. Est una cosa legìtima e finas ùtile: ca nos dat sa possibilidade de bìdere mègius is diferèntzias chi bi sunt, e de seberare. Deo fatzo parte de sa chi punnat a una limba ufitziale, in sa versione chi amus e chi benit impitada in telegiornales e in su festival de Venètzia. Ma si in su movimentu operaju amus àpidu diretziones chi si sunt postas de acordu cun sa burghesia – mi siat cuntzessu su paragone – inoghe amus àpidu chie, finas abarrende “de jure” in su movimentu linguìsticu, at traballadu “de facto” pro nche ghetare a terra su chi bi fiat.
Ca unu puntu de sìntesi podiat èssere su de mantènnere su Servìtziu limba sarda. Est a nàrrere: “ddu mantenimus posca s’at a bìdere”. Como – mancari chi Coròngiu at naradu chi a cussu servìtziu non bi diat torrare mai – semus sena ghia. Tando tocat a imbentare cosas noas. E no est “sa polìtica” chi no at chertu sighire a mantènnere su chi aìamus, ma una parte de issa. Sa matessi parte chi Biolchini bolet leare in cunsideru e pònnere in su “schieramento” comente chi non siat sutzessu nudda. Sena cussu puntu mìnimu cale diant èssere is àteros puntos? Is cojas in sardu? Su grafema “*” pro evitare chi una paràula agabbet cun sa “i” o cun sa “e”?
Su Csu est giughende in antis is propostas suas. Is àteros fatzant sa matessi cosa. Gasi comente cale si siat militante pro sa limba sarda podet e depet seberare in cale banda de su movimentu linguìsticu istare, sa regione depet seberare si est mègius a àere peruna, una o duas normas. Si posca s’assessore Firino nos bolet pònnere totus paris a conca a pare, beh, issa ddu podet fàghere. Ma s’at a abbigiare chi est a pèrdere tempus. Ca chistione est simple meda: est a seberare.
Ùrtima cosa: Vito Biolchini, interessadu a sa limba, est unu de su movimentu linguìsticu. Duncas ddu diamus chèrrere lèghere/intendere in sardu
Leave a comment