Programatzione europea: sa Giunta si presentat cun un'idea arcàica de Sardigna

Programatzione europea: sa Giunta si presentat cun un'idea arcàica de Sardigna

de Giuseppe Pepe Coròngiu Cagliari Regione Sardegna-2

Sa Sardigna? S’identidade sua est che a terra <antica, selvaggia e unica>. Cando l’apo lèghidu non bi creia. Galu gasi semus? Ca non l’apo agatadu in unu sàgiu istòricu de Grazia Deledda e mancu in unu cabu de òbera ‘orientalista’ de Lawrence o Bechi o Vittorini.

Est imbetzes s’idea esòtica de ‘cultura’ in Sardigna chi est a fundamentu de sa programatzione regionale unitària 2014-2020 de sos fundos europeos. Un’atu polìticu-amministrativu de medire a sa sèria, non una brulla de cunvegneddu o unu artìculu de giornale.

Non bi creides? Lèghide su chi nde bogat a pìgiu su senadu acadèmicu chi guvernat pro tempore in arburada Trento de Casteddu. Informade.bos. Sunt determinos chi abarrant e chi guvernant pro annos sos sèberos de unu muntone de dinare.

Lìnias chi sa Regione disinnat pro gastare su dinare chi li dat s’Europa. Su documentu de indicu pro impreare 5,5 miliardos de èuros in 6 annos chi est coladu s’àtera die in Cussìgiu Regionale, in presse in presse e a mudu a mudu, a pustis de sa presentada fata dae s’assessore Paci in sa cummissione bilàntziu.

Sa nova, chi ghetat annùgiu, est chi si s’idea culturale de s’ìsula nostra est galu custa, e tando in ite l’ant a fulliare cussu dinare? De seguru non in una polìtica linguìstica moderna. De seguru non in una limba natzionale sarda impulsada che a motore de isvilupu. De seguru non in ufìtzios de sa limba o in un’agèntzia regionale pro su bilinguismu chi pedimus dae trinta annos. De seguru non in una Sardigna democràtica chi punnat a sa soberania.

Semus galu a sas ideas deleddianas de primitivismu cundidu de sole, mare e pastores. Gasi comente apo contadu, finas pro fatos extralunguìsticos, in su libru meu ‘Il sardo una lingua normale’. Ma possìbile chi su guvernu de sos professores non renèssat a creare un’idea diferente e posta a die de s’ìsula nostra? Non paret beru. Semus postos male.

Ite cheret nàrrere chi sa cultura nostra est ‘ùnica’? Non sunt totu ùnicas sas culturas? O nois semus ispetziales ? Mah…

Ma tando, pro sos programadores regionales e pro sos assessores-professores ite est e a ite serbit sa cultura ‘sarda’?

Si sighides a lèghere, semper in custu pabiru, si faeddat de cultura, traditziones, limba, archeologia, antropologia e àteru. E si lassat cumprèndere chi non sunt cosas chi balent dae sese, ma chi ant una balia econòmica chi si podet medire petzi si sunt impreadas pro afortigare su turismu. E tando su sèberu de su guvernu regionale est a sighire a presentare a su mundu custa idea de Sardigna firma, arcàica, arretrada e istereòtipada. Pastores e seadas, culurgiones e ballos. Limbas e rituales a trèulu, non una limba natzionale normale. De soberania nudda.

Sa cultura nostra, ponende in mente a custas lìnias programàticas, est cussa tando de sos pregiudìtzios e de sos logos comunes prus rebestos chi amus semper chircadu de nche bogare. E chi in tames torrant che a formas e sustàntzia de idea de ‘isvilùpu’ chi sos programatores e polìticos regionales detzidint pro s’ìsula nostra in custos annos imbenientes. Unu modellu de isvilupu fallidu chi torrat comente s’annada mala.

Si comintzat a cumprèndere chi sa cantzone de Pago e Mogol no est una cumbinatzione, unu giogu, ma su sinnu de un’istrategia. Su baratu esòticu chi agradat a sos italianos de Sardigna pesadu a bandera de s’identidade. Una derruta, mesches pro sos soberanistas chi sunt in su guvernu.

Sas èlites chi cumandant in Sardigna, màssimu cuddas de s’acadèmia italianista, sighint a abbaidare a sas cosas nostras comente chi apant sos ogros de sos de fora. Comente chi siant biagiadores de passàgiu in Sardigna. Comente chi siant turistas in sa terra issoro e chi no siant parte de custu pòpulu.

Ma sighint a lu guvernare cun s’orientalismu e cun s’idea chi su primitivismu turìsticu siat una resursa. E nd’est imbetzes sa cundenna nostra. Unu guvernu, mi timo, chi podet àere tretos medas de economitzismu tzentralistra. Sinnos colonialistas in fines. E cunservadores….

Nd’amus a bìdere bellas, si non si mudat impreu.

Leghe su documentu

Leave a comment

3 Comments

  1. E’ SCANDALOSO TUTTO CIO’non NEL 2014!
    OH PIGLIARU “SCIDADINDI*!)

  2. Sarebbe utile e corretto indicare la reperibilità del documento di riferimento, perché ce n’è più d’uno. Grazie.

  3. Poiché non c’è risposta alla mia richiesta, la fornisco io. Anzitutto a http://www.regione.sardegna.it/documenti/1_73_20140529175506.pdf. Poi, all’interno di http://www.aladinpensiero.it/?p=28826 vi sono altri documenti della regione. Niente di “terra “, sempre che questa lettura o parafrasi non si intendaa riferita all’incentivazione del turismo e agli scavi di Monte Prama (due argomenti tra cento altri). Ma anche così non c’è corrispondenza.
    La prego anche di pubblicare. Grazie.

Send a Comment

S'indiritzu email tuo no at a èssere publicadu. Is campos pedidos sunt signados *