PD, finas Castàngia improsat sa LSC

PD, finas Castàngia improsat sa LSC

de Marco Solinas

LOGO_PD sardegna Carchi die a oe est essida sa nova chi Renato Soru, a pustis de chimbe annos de mudìmene a pitzu de sa chistione linguìstica, est torradu a nde allegare, narende paràulas chi a medas de nois nos fiat pràghidu a intèndere dae issu in antis e, mesches, prus a s’ispissu. Sa cosa prus de importu, a pàrrere miu, est chi su ex Presidente de sa Sardigna at naradu làdinu làdinu chi pro issu sa defensa de sa limba sarda colat a mala bògia peri s’istandard ùnicu de iscritura, sa LSC. Custas paràulas non lassant logu a duda peruna, sunt craras e non si podent interpretare a manera diferente.

Comente apo lèghidu su post de Clara Farina in limbasarda2.0 m’apo pensadu deretu chi Soru est candidadu a sa segreteria regionale de su PD sardu. E duncas custa essida, mancari de importu pro su movimentu linguìsticu, est istrumentale (in su sensu bonu) a sa campànnia eletorale cosa sua. Bene at fatu Soru a resonare de sa chistione linguìstica, faghende·dda intrare in sa dibata intre sos candidados. Immoe chi su movimentu linguìsticu ischit chi Soru est semper in favore de sa LSC, tocat de cumprèndere is àteros duos candidados, Thomas Castàngia e Ignazio Angioni, ite nde pensant. Apo cumpartzidu in facebook s’artìculu cun su post de Clara Farina, tzitende a Thomas Castàngia in su cummentu, pro ddi pregontare cale fiat s’opinione sua a pitzu de custa chistione. Su giòvanu candidadu m’at torradu isceda de aici:

In contu de polìtica linguìstica aìamus fatu unu traballu bonu in sa legisladura 2004-2009, e medas isperimentatziones si sunt faghende in comunos e amministratziones cosa nostra. Mi diat pràghere a nde bìdere is datos chi ponent in correlatzione sa dispersione iscolàstica e sa chistione de sa limba sarda. Mi paret chi amus tentu presse meda a atzetare s’idea chi de su Sardu nde podìamus fàghere a mancu, ca is giòvanos non ddu allegant prus, ma mi so timende chi su problema imprasset non sa limba isceti ma fintzas s’atinu chi diamus tènnere comente pòpulu.

Custu resonu nos narat duas cosas: Thomas Castàngia rivèndicat su traballu fatu in cussos annos, chi incluit duncas fintzas sa LSC, e ischit chi a promòvere su Sardu est su primu passu fache a una autodeterminatzione bera de su pòpulu sardu. Bene meda. Ma, a dolu mannu suo e nostru, no at tentu sa pròpiu craresa de Soru in contu de LSC. Podimus petzi immaginare chi, in su rivendicare su chi aiat fatu su tzentru-manca in is annos de sa Giunta Soru, issu ddoe ponet sa LSC puru. Su de su istandard est su tema tzentrale de sa dibata in custos ùrtimos meses, e duncas diat èssere de profetu pro totus a ischire ite nde pensat a beru unu candidadu a sa ghia de unu partidu mannu, comente est su PD in Sardigna, mesches a pustis chi unu de is àteros at tentu s’atza de nàrrere cun craresa manna s’opinione sua. Tando, si dd’apo torradu a dimandare, a manera prus esplìtzita. Acò sas rispostas:

Totu is chi de custu tema nd’ischint meda prus de mene e chi b’apo chistionadu narant chi est de profetu a poderare sa LSC che istandard.

A parusu, deo pòngio mente a is chi de unu tema nd’ischint prus de mene.

Duncas, mancari in suspu e impreende locutziones averbiales suspetas (a ite cussu “a parusu”?), paret chi Thomas Castàngia puru nos siat narende chi sa LSC est un’aina chi non si nde podet fàghere a mancu. Sa lògica diat bòlere chi, si amus interpretadu bene su chi Castàngia m’at rispostu, pro issu puru su PD diat dèpere mandare a in antis una polìtica linguìstica coerente cun sa de is ùrtimos 8 annos. Cosa bona diat èssere chi su Presidente Pìgliaru, s’assessora Firino e totu is cussigeris chi faghent parte oe in die de sa coalitzione de tzentru-manca in sa Regione, leent cussèntzia de su fatu chi nessi duos – non connoschimus, galu, su parre de su senadore Angioni – de sos tres candidados a segretàriu de su PD pensant chi sa polìtica linguìstica sarda bolet fata sighende sa pròpiu àndala chi sa RAS at sighidu fintzas a is primos meses de ocannu. E, annanghimus nois, fintzas a cando issos non nd’at catzadu a Coròngiu, faghende a manera de firmare totu, isetende carchi cosa chi ancora non si cumprendet bene it’est. Soru at faeddadu a craru. Castàngia prus pagu, però paret chi su pensu suo non siat aici a tesu dae su de Soru. Tando s’ispera chi tenimus totus, dia nàrrere, est chi su segretàriu chi nd’at a essire dae custas eletziones fatzat a manera chi, in contu de polìtica linguìstica puru, su guvernu sardu s’ischidet e cumentzet a traballare a beru e cun profetu, a manera coerente cun su traballu fatu dae su 2006 a s’incumentzu de ocannu. Traballu chi, comente est nòdidu, at cumpridu resurtados mannos chi diat èssere una làstima a iscabulare, e una neghe manna de is chi una cosa de aici dda diant permìtere.

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *