de Giuseppe Pepe Coròngiu
Ma Deus podet èssere pintadu narilongu che a Pinòchiu? E Santu Frantziscu a bicu in fora ispogiadu che a mama chi l’at fatu? Ma est issu o est Gepetu? E unu preide mentres abutinat unu pipiu che a su Gatu e a su Margiane cun su buratinu? E Nostra Sennora (ma finas sa Giana Asulina) a titas e natura in fora chi resat ditzos dìligos in unu letu de frores ritzu?
Su giogu de mesturare tramas e isciocare cussèntzias LucidoSottile, sa cumpangia de teatru casteddaia de Tiziana Troja e Michela Sale Musio, l’at fatu e torradu a fàghere. Finas in Europa, in Madrid in ue ant batidu, carchi die a como, ‘In su chelu siat’ sa bortadura in sardu de ‘Holy Peep Show’, fata dae Mariantonietta Piga.
Los at ospitados su Fringe Festival in su Matadero de sa capìtale ibèrica. Meressimentu mannu de Gianni Garbati, presidente de su tzìrculu de sos sardos. S’operatzione est renèssida. In su pùblicu, atentu e cumpetente, ispagnolos meda. Chi ant naradu, intervistados fora dae una tv, chi su sardu est una limba chi si prestat a custu ‘rituale’. Unu faeddu latinu, serente a su castillianu cun su cale cumpartzit paràulas e istòria. Paris faghent unu intritzu galanu e misteriosu. De ischìssiu pro nois. Ma no est importante a cumprèndere onni faeddu, narant sos madrilenos, su contu si sighit bene, finas si lassat iscussertados.
S’iscussertu est a sighire custu biàgiu metafìsicu e crudu fatu de pinturas atzudas e crispas. Si caminat in unu teatru-cantieri ghiados dae padres e mamas ispirituales. Totu in una si ànimant sos cuadros. Bios. Atzudos o durches.
Sos personàgios abòghinant e pretendent atentu. Non ti podes aseliare in custu ‘ispetàculu’: ti paret a cada passu chi nche podes rùere finas tue in intro de custa istòria maca. E si rues ti nd’as a torrare a pesare? O nche la finis in manu a unu preide pedòfilu o a una bagassa mala?
Prus avantzas e prus intras in custu pertusu isperrumadu, iscuru, coloradu e rànchidu. Ti corcas in sa trama. O t’abandonas a sos tretos lèbios.
Mandigafogu at in conca una bandera italiana e frastimat in sardu cun tirria marigosa. Cheret brusiare sas màscaras e las atzionat a cumandu. Pregontat cosas a su pùblicu. E si brùsiat a mie, podet pensare s’ispetadore?
Gesus est mesu crabu e mesu fèmina. Barbuda però. Bombet sàmbene in terra e iscràmiat dae su dolu apretadu dae una bagassa. Mentres Maria de Màgdala l’ispuntòrgiat si acontzat su nasu longu longu e torrat a si aposentare in sa rughe.
Deus a podet èssere faulàrgiu? No, est chi a issas, a sas Lùghidas lis interessat a contare sas ipocrisias de sas crèsias. Finas cussas de su teatru cunformista.
Su Grillu est fèmina e a primìtzios ammesturat limbas, màgines e bisos che a totu s’òbera. Una preneta. Unu fadu. In cantas tzitades, limbas e in cantos bisos macos s’at a inscenare galu ‘Holy Peep Show’?
Àteras bortas mègius.
