Sa proposta de unu ‘partidu pro sa limba sarda’ fata dae Bàrtolu Porcheddu in s’addòbiu de su grupu ‘Solu in sardu’ de Atzara calicuna die como, est agradada a medas. No a totus, est òviu, ma leghende sos cummentos a fùrriu (mescamente in Facebook) no at leadu cussu muntone de respostas negativas chi si podiant isetare. Antzis, s’ipòtesi de custu movimentu nou ‘Sardigna nostra’ est parta a medas comente lòmpida a su tempus pretzisu, cando sa polìtica de s’assessore Firino est agabbende comomai cale si siat ispera de renàschida pro sa limba nostra.
Porcheddu in Atzara non s’est limitadu: issu at fatu una filìpica contra a sa polìtica sarda inadeguada, at collidu sas adesiones a s’assòtziu nou “Sardigna Nostra” e posca at bogadu a pìgiu sa proposta de sa lista eletorale “limba sarda”.
<In duos annos e mesu su tzentrusinistra – at naradu Porcheddu – no est resessidu a fàghere nudda. At minimadu sos finantziamentos e at frimmadu sa polìtica chi si faghiat a dae in antis. Tando la depimus agabbare de pedire a destra e manca, nos depimus leare su podere e fàghere nois>.
Pro s’iscritore Nanni Falconi, pro nàrrere, custa lista <no at sos votos de giumpare su “sbarramentu”, a sa sola. Ma una scutinada la podet fintzas dare a su mundu polìticu>. Pro s’ativista linguìsticu Martine Faedda <Intre una coalitzione andat bene meda. A su mancu amus a intèndere calicunu impreende su sardu in is tribunas polìticas>. No est su pàrre de Lucio Porcu, chi sighit dae annos medas sas polìticas linguìsticas, e chi sustenet chi ‘fintzas a sa sola mi paret un’idea bona’. Parres a favore dae paritzos militantes comente Ignazio Piga, Antoni Caria, Mario Unali, Marcello Bacciu, Anna Maria Zedditta. Prus arresonadu su pensamentu de Peppe Luisi Pala, istòricu patriota de Sardigna Natzione :’…si allegamos de unidade o de cumpartzidura de linia e de obietivos podet andare bene, ma si est po criare un’ateru fioteddu de pessonas… …a dolu mannu,…bastant sos chi bi sunt’.
No est de acordu imbetzes Lucio Allegria Usai chi afirmat chi :’Penso chi no at sensu. Sa limba sarda comuna, a bisu meu, no est una chistione foras dae sa lota de liberatzione natzionale, duncas depet istare intro de sas polìticas de sos movimentos e partitos indipendentistas’.
Unu pitzocu cun su pseudònimu de Douglas Soros pensat chi ‘ Una lista pro-limba sarda a intro de una coalitzione sèria diat poder esser un’idea de profetu. Una lista a sola o cosas gosi diat esser una cosa zai bida. S’importante est a no improvisare nudda’
A favore imbetzes Arricu Bachis. Pro un’àteru paranùmene nòdidu in Internet (Ansoni Isu) s’arresonu imbetzes est longu. ‘Perdonade ca so una boghe cuntraria (nudda de personale, siat craru), ma no so de accordu chi unu partidu at a serbire a cosa de profettu. Penso chi su movimentu limbistigu arrischet meda ponendesi bestimenta de partidu politigu, cando est unu movimentu sotziale e unu grupu de pressione. In primis, s’unu e s’atteru sun attores politigos chi toccat a distingher, ca si cumportan in maneras diferentes. Chene fagher una lista de sos elementos chi nos permittin de narrer itte est s’unu e itte est s’atteru, unu grupu de pressione est pro un’obiettivu ebbia, ma unu partidu si depet curare de medas atteras chistiones. Deo apo dudas pro custu progetu, ca bido nemmancu unu “pro” ma medas “contra”: custu partidu, chi diat a perder sas eletziones, diat a marcare sa derrota de su movimentu limbistigu. Invetzes de unu partidu, penso chi custu movimentu si depat strutturare de prus, torrende a cumprender fintzas attera zente cun atteras opiniones in contu de standard e cosas gai, e abbarret unu grupu de pressione, bonu a fagher appellu multipartitigu pro sos obiettivos suos. Malu no est, pro esempiu, presentare a sos partidos chi si an a presentare in sas regionales unu documentu, a tipu carta programmatiga, chi su partidu binchidore (calesisiat) pighet in cunsideru pro sa chistione limbistiga’.
Negativu finas su parre de Perdu Perra, aversàriu istòricu de s’istandardizatzione e a favore de sa divisione de su sardu in duas limbas: ‘At a pigare pagu votos’, est sa sentèntzia.
redatzione
Leave a comment