Lista eletorale “pro limba”, proposta choc dae Atzara

Lista eletorale “pro limba”, proposta choc dae Atzara
Addòbiu de Atzara
Addòbiu de Atzara

Terremotu polìticu a sas bistas? Bàrtolu Porcheddu, ativista de su movimentu linguìsticu, ponet in campu una proposta isciocante: “Pro sa limba sarda tocat a fàghere una lista pro sas eletziones regionales imbenientes” ; una lista chi nche pòngiat a un’ala totu sos partidos italianos, de dereta, de tzentru e de manca; una lista chi pòngiat in abolotu unu panorama polìticu, econòmicu e sotziale firmu, in ue sos rapresentantes de sas istitutziones sardas sunt meros esecutores de sas detzisiones romanas.

Est capitadu su 13 de austu in Atzara, in ocasione de s’addòviu annuale de su grupu fb “Solu in sardu”. In antis de su pràngiu sotziale b’at àpidu un’ “aperitivu literàriu” in ue, sugugiados dae Sarvadore Serra, Pepe Coròngiu e Bàrtolu Porcheddu ant faeddadu de sas essidas editoriales issoro prus reghentes (rispetivamente, su libru “Il sardo una lingua normale” e sa rivista “Logosardigna”).

Ma Porcheddu non s’est limitadu a presentare sa rivista: issu at fatu una filìpica contra a sa polìtica sarda inadeguada, at collidu sas adesiones a s’assòtziu nou “Sardigna Nostra” e, apuntu, at bogadu a pìgiu sa proposta de sa lista eletorale “limba sarda”.

<In duos annos e mesu su tzentrusinistra – at naradu Porcheddu – no est resessidu a fàghere nudda. At minimadu sos finantziamentos e at frimmadu sa polìtica chi si faghiat a dae in antis. Tando la depimus agabbare de pedire a destra e manca, nos depimus leare su podere e fàghere nois>.

Addòbiu de Solu in sardu in Atzara
Addòbiu de Solu in sardu in Atzara

Cales ant a èssere, como, sas reatziones in su mundu polìticu  chi sighit a isputzire sa limba sarda e sa politica linguìstica? Cales reatziones in su mundu de sa limba sarda? Amus a bìdere. De seguru custu mesaustu at a èssere caente meda.

(sa redatzione)

Leave a comment

2 Comments

  1. Una possibilidade manna pro sa Sardignia!

  2. at’ a essere sae millieuna pensada, pro contu meu andat bene meda; azis a bider chi bi resessimus. Mario Unale de Tzaramonte de Anglona provintzia de Tatari

Send a Comment

S'indiritzu email tuo no at a èssere publicadu. Is campos pedidos sunt signados *