Su nùmene de su progetu est su resumu de sa faina: “S’istòria sarda in s’iscola italiana”. Est su traballu a cumone de unos cantos insinnantes de s’iscola primàrgia pro aparitzare materiales de istùdiu de s’istòria natzionale sarda. Isabella Tore, Maurizio Onnis, Alessandra Garau, Annarosa Corda e Andrea Ledda eris in Aristanis, in sa sala de su Hospitalis Sancti Antoni, ant acraridu e cumpartzidu capia e tenta de custa initziativa de importu.
Sa punna est làdina: fàghere a manera chi in sas iscolas italianas in Sardigna lompat s’istòria sarda. Comintzende dae s’iscola primàrgia (chi diant èssere sas elementares) in ue, comente in sos àteros òrdine de istùdios, non b’est in sos programmas s’istòria de sa terra nostra. Totu su chi si faghet, o diat pòdere èssere fatu, est lassadu a su volontariadu. Comente cussu de custos insegnantes chi creent a su chi faghent, istimant sa terra nostra e s’istòria sua e traballant pro chi sos pipios la connoscant.
Posca su saludu de s’assessora comunale Maria Obinu, Maurizio Onnis at presentadu sos reladores e sa ‘ratio’ de su progetu, chi est cussa de pònnere a disponimentu materiales pro s’istùdiu de s’istòria sarda in iscola. Isabella Tore at mustradu su primu de custos materiales chi est unu pdf cun su programma pro sos iscolanos de oto annos de sa tertza elementare. Alessandra Garau at iscumbatadu comente su traballu est fatu cun piessignos e critèrios iscientìficos. Annarosa Corda at faeddadu de comente su traballu s’at a ismanniare in sos meses e annos imbenientes cun sos àteros materiales didàticos pro acumprire totu su cursu de s’iscola primàrgia.
Su dibàtitu est istadu apentosu e sèriu. Mastras, mastros, babbos e mamas chi ant prenadu sa sala ant dadu disponibilidade pro afortigare una retze chi potzat isparghinare sos materiales e s’imparu fitianu in iscola de s’istòria sarda. «De su pdf pro sa tertza elementare – at informadu Onnis – s’at a fàghere finas sa bortadura in sardu». Una sensibilidade de non medire sena atentu.
Sa Regione fiat ausente. De su restu s’autonomia nostra non nos cunsentit de programmare oras de istòria sarda in sas iscolas ministeriales. E in capas su guvernu regionale atuale non nde tenet mancu sa gana nen sa fortza. E tando cale diat èssere s’issòlvida? Cussa de dare una ghetada de manu totus pro fàghere girare in totu sas iscolas custu materiale. Sos mastros l’impreent e nde faeddent cun àteros mastros, sos babbos e mamas pedant a sas iscolas de l’adotare. Su volontariadu de cussos chi ant una cussèntzia natzionale pro sa Sardigna est importante.
E tando bois chi leghides dae·bos una mòvida.
Su pdf si podet iscarrigare a indonu inoghe: ss3e.
Leave a comment