Formatzione insinnantes: in Casteddu movet dae cras, in Tàtari est firma

Formatzione Insinnantes Limba Sarda
Sa formatzione de sos insinnantes in limba sarda s’at a fàghere de seguru. A su mancu in Casteddu, mentres in Tàtari no bi isperamus prus. Chenàbura 11 e sàpadu 12 de santandria chi benint Universidade de Casteddu, Diretzione Iscolàstica Regionale e Assessoradu Regionale de s’Istrutzione Pùblica ant cumintzare sa fase cuncreta de acumprimentu a sos cursos chi sunt isetados dae sos operadores dae deghinas de annos. “S’impreu de su sardu veiculare in s’Iscola e in s’Universidade” est su tìtulu de su cunvegnu de istùdios, promòvidu in Casteddu, in s’hotel Regina Margherita, dae sos tres entes cumpetentes e chi at dare su “la” a su progetu FILS, acrònimu chi istat pro “Formatzione de sos Insinnantes in Limba Sarda”, chi diat èssere un’idea de ambìtzia pro costruire una sèmida pedagògicu-educativa pro torrare a nou sa limba locale in sas istitutziones iscolàsticas.

A bisu de sos datos frunidos dae sa Facultade de Lìteras e Filosofia de s’ateneu casteddàju, sunt unos chentu sos dotzentes in e de limba sarda chi ant coladu sas seletziones pro su primu annu de cursu chi at a mòvere de a veras intre carchi chida. Est unu grupu de pessones cualificadas meda, de ruolu e nono, chi ant a manera formale, pedidu de aderire a su programa de formatzione e chi sunt istrada seletzionadas cun una verìfica de conoschèntzia bàsica de sa limba, de sas metodologias didàticas e de sa normativa in riferimentu a sas minorias linguìsticas.

Su cunvegnu acadèmicu de livellu istatale, chi s’at a fàghere chenàbura a die intrea, printzipiende dae sas 10.00, e sàpadu intre totu sa mangianada finas a ora de sas 13, in sas salas de s’hotel casteddàju, at a adduire a s’iscaretzimentu cun sas realidades prus avantzadas chi sunt presentes in su territòriu italianu pro sas limbas de minoria reconnotas cun sa legge 482/99.

Est in programa su saludu de Sergio Milia, assessore de s’istrutzione pùblica, de su Retore de s’Universidade Giovanni Melis e de su Diretore iscolàsticu Regionale Enrico Tocco. Aberit sos traballos Giuseppe Corongiu. Ant a sighire Michele Lo Porcaro (Universidade de Zurigo), Giuliano Bernini (Universidade de Bergamo). A merie Antonella Sorace (UNiversidade de Edimburgo), Roland Verra (Sorastan ladinu – Boltzanu), Rosalba Perin (Diretzione Iscolàstica Regionale Friuli). E in prus ant a faeddare Sabrina Rasom (ladinos de Fassa) e Patrizia Cordin (Universidade de Trento).

Sàpadu, a mangianu, unos cantos acadèmicos de s’ateneu de Casteddu s’ant a impitzare in lezione acadèmicas fatas totu in sardu. Sos professores sunt: Maurizio Virdis, Giovanni Ugas, Francesco Carboni, Giampaolo Loy e Mauro Maxia.