Su progetu FOLS, ammaniadu dae s’Assessoradu Regionale a sa Istrutzione Pùblica cun s’agiudu de su sòtziu culturale-cooperativa ” L’Altra Cultura”, est unu cursu de agiornamentu e de formatzione pro sos operadores chi traballant e faghent sa polìtica linguìstica in Sardigna. Comintzadu su 21 de ghennàrgiu est agabbadu su 11 de martzu, a pustis de ses diadas de istùdiu de profetu cun espertos de livellu internatzionale chi ant fatu letzione e rispostu a sas domandas de sos operadores.
Sa punna prus manna est istada sa de ismanniare sas connoschèntzias de sos professionistas de sos ufìtzios de sa limba sarda pro su chi pertocat sa chistione de sa pianificatzione e istandardizatzione linguìstica. Ma fintzas sa de mustrare sos istereòtipos e sos pregiudìtzios in subra de sas chistiones linguìsticas, ideas prus che in prus chi no ant fundamentu iscientìficu peruna e chi sunt contra a una istandardizatzione.
Àtera punna de importu de su cursu est su de dare una professionalidade de gabbale e prus manna a sos chi traballant in custu setore: a s’ispissu sunt cunsiderados che apassionados e amantiosos de sa limba e non che a gente chi traballat cun su sardu e pro su sardu.
Sos chi ant a leadu parte a sos addòbbios ant a retzire unu tzertificadu chi at a serbire pro pòdere traballare in sos ufìtzios linguìsticos e chi at a dare puntègiu in su momentu chi s’at a cumpilare unu elencu professionale.