de Roberto Carta
A s’intelletuale sa «lana» praghet meda. O si cherides narade.li tzarra. Ma «lana» torrat de prus, ca proite nos dat manera de impitare sa paràula (e duncas su cuntzetu) «lanivuzu». Su lanivuzu est su faeddare meda, su faeddare semper, ma prus che àteru est su faeddare e bostu. Faeddare e non fàghere. Su chi m’est bènnidu a bidea leghende de s’addòbiu contivigiadu dae su sòtziu Fondazione Sardinia e dae su cussigeri regionale Paolo Zedda. Naro Paolo Zedda ca est su profilu suo (isponsorizadu a pagamenta in facebook) chi mi cumbidat a custu addòbiu.
Tando, sa Fundatzione Sardinia (chena bos confùndere però, no est a beru una fundatzione) cramat sos artos pabantzolos sardos (impito unu limbàgiu caru meda a Tex Willer) de su Parlamentu (Uras, Cotti) de sa Regione (Firino, Maninchedda, Sedda, Zedda, Sale, Busia, Anedda, Cocco) e los cumbidat a illanare subra de sa “Ratifica della Carta Europea delle lingue regionali o minoritarie e nuove linee di politica linguistica in Sardegna”.
Naro illanare ca sa Fundatzione Sardinia faeddat de limba dae cando est nàschida ma nde faeddat belle semper in italianu: libros iscritos in italianu e addòbios prus a totu in limba italiana. A pàrrere meu si non si bàrigat dae sas paràulas a su fàghere, su chi si proponet est lanivuzu ebbia, su chi in italianu si diat pòdere nàrrere «discussionismo». E mi dispraghet. Proite? Ca sa Fundatzione Sardinia s’est ismentighende sa letzione de Pasolini, s’est ghetende a fàghere sa caratza finas issa, una caratza chi sighit a cuare unu bòidu de ideas, de persones, de valores in contu de limba. Màssimu in sos logos chi contant: Universidade e Regione. Proite lu faghet?
Sos de sa Fundatzione Sardinia est totu gente chi at dae sos 60 a sos 75 annos, sunt de sa matessi genia (comente edade naro) de sos chi ant su pòdere in Sardigna e chi sighint a lu chèrrere in intre de sas manos issoro. Ant pèrdidu un’annu faghet su mègius istudiosu, a Placido Cherchi. Segundu me no est a casu chi in s’ùrtimu addòbiu in ammentu de Placido Cherchi, fatu in Casteddu, non sunt istados cumbidados a bi essere. No est a casu chi Placido Cherchi in s’ùrtimu libru suo (Per un’identità critica. Alcune incursioni autoanalitiche nel mondo identitario dei sardi) apat iscritu chi sos chi lis copiaiant sos traballos fiant in medas e finas prus bravos de a isse a los dispatzare.
Si penso chi su mundu isulanu universitàriu, francu a Placido Cherchi, at semper pensadu a sos de sa Fundatzione Sardinia comente a bravos «imbonitori» (pròpiu gasi lis narant) ma cun unu mètodu iscientìficu de si nde rìere (e so faeddende de cussu mundu acadèmicu chi naschet dae Cirese e de De Martino), non resesso pròpiu a cumprèndere ite gustu bi leant a istare galu fatu a unu mundu chi pagu los carculat e, antzis, los faghet a preure de terra. Apo bidu chi Bandinu non bi partetzipat, a nota mala pròpiu isse chi carchi cosa in sardu l’at iscrita (li est istada publicada da “Il Maestrale”) e prus a totu la narat.
In s’addòbiu b’at istràngios de su guvernu regionale, duos assessores: Firino e Maninchedda. Sos matessi assessores chi ant cramadu una «matematica» a fàghere sa diretora de su Servitziu Limba Sarda. De custu sa Fundatzione Sardinia ite narat? Forsis cussìgiat chi est mègius a faeddare de àteru, pro non pensare meda a sas cosas chi non torrant. Ma no est chi a sufrire de burghesia orientalista, paris cun s’Universidade e sa Giunta Regionale, b’est finas sa Fundatzione Sardinia?
P.S. In contu de sa “Carta Europea delle lingue regionali” e de Polìtica Linguistica leghe inoghe su chi apo iscritu e imbiadu a Sardinia Post. (Si isetamus sos artos pabantzolos istamus friscos…)
post leadu dae su blog de Roberto Carta
http://robertocarta.wordpress.com/2014/11/28/discussionismo-lanivuzu-ahi-ahi-fundatzione-sardinia-2/
Leave a comment
A cussa zente ki istant a sa Regione (Cagliari) de sa limba sarda no nde l’importat nudda. Pro issos est un’infadu ebbia. Gaghent sa finta de faghre calki cosighedda, donzi tantu, e postis nudda. Sunt imbarende ki sa Limba nosthra si cke morit. Ma fintzas a sos sardos de sa limba issoro e de sos babbos issoro l’importat pagu: como sunt totu italianizados e ant ateros problemas e desizos areru ki Limba Sarda. Si su Pobulu Sardu fit interessdu de aberu a custha allega, aint fattu una revolussiones, intamen mancu bi pensat. E in cue si nde kkerent sos pabanzolos pro continuare su lanivugiu finza a sa fine.
Una proa de reatzione si podet fagher cun unu soziu de pressione politica ki podet movere unu tzertu numeru de votos pro kie s’impegnat cun fatos reales pro sa Limba Nostha, a cominzare cun unu premiu a sas famizas noa ki imparant su Sardu a sos fizos minoreddos e los faeddant solu in Sardu. Pustis fagher pressione pro faedhare in Limba Sarda in sa ischolas a incumintzare dae sas maternas (in S’Alighera lu faghent jà dae meda!). Totu custhu keret fattu connoscher a sa zente e organizare banchitos in totue in Sardinia, pro leare meda frimmas de zente in favore, dae ischudere, a pustis, in cara a sos politicos sardos rennegados, teracos de sos italianos