Diretore limba: Firino non sèberat. E como tocat a Pigliaru

PigliaruClaudia Firino at seberadu de non seberare. Su Servìtziu Limba Sarda est galu sena diretore pustis sa essida su 16 de maju de Pepe Coròngiu pro problemas burocràticos. Como sa chistione lompet in pessu a sas manos de su Presidente Pigliaru. At a èssere s’economista tataresu a capu de sa Regione chi at a tènnere su pòdere de nominare su diretore amministrativu nou de su servìtziu linguìsticu regionale.

Est sa normativa in contu de personale dirigentziale chi prevedit custu. Sa lege chi guvernat sas chistiones de sos conferimentos de incàrrigos a sos dirigentes, sa nùmeru 31 de su 1998, narat difatis a s’artìculu 28 comma 7 chi coladas 60 dies dae sa vacàntzia subravènnida, s’assessore perdet su deretu de propònnere a s’assessore de su personale su nòmene nou. In custu casu est su Presidente de sa Giunta chi intrat e leat sos poderes de nòmina. Su capu de s’esecutivu podet nòminare finas sena su parre de s’assessore de sa cultura e cussu de su personale. E sena iscadèntzias istabilidas.

Oviamente, a èssere nominados podent èssere petzi sos chi sunt diretores amministrativos de ruolu in sa Regione. Non si podent nominare nè esternos nè àteros dipendentes regionales. Sa ‘corporatzione’ de sos dirigentes regionales fiat resessida in custos annos a abolire totu sas leges chi permitiant cumandos o mobilidade. E custu aiat provocadu sa decadèntzia de Coròngiu chi ghiaiat su servìtziu dae sa nàschida sua in su 2008 sende ‘prestadu’ dae un’àtera amministratzione pùblica. Su Cussìgiu Regionale posca aiat detzisu de non detzìdere in meritu a una proposta de lege de su cussigeri Efes Arbau chi cheriat prorogare su cumandu de su diretore chi depiat essire.

Ma a blocare sa norma de urgèntzia (chi boliat s’unanimidade de sos capogrupos) fiat istadu Emilio Usula, capogrupu de Soberania. Su cussigeri Rossomori Paolo Zedda (babbu de is Arrègulas e de sa proposta de dòpia norma) aiat declaradu a Daniela Pinna de s’Unione Sarda, chi pro Corongiu non b’aiat s’urgèntzia de lu cunfirmare cun una lege ca giai si podiat sostituire a manera fàtzile.

E galu semus gasi, mentres sa proposta de una cummissione chi aiant fatu Zedda, Blasco e àteros pro gestire sas resursas no est prevèdida dae s’ordinamentu regionale. S’Osservatòriu imbetzes est decàdidu coladas 120 dies dae sas eletziones.

Sa polìtica linguìstica est firma dae ghennàrgiu. Sena indicos pro finantziamentos e sena pranu triennale. Morta. Isetende sa ghetada de manu de Pigliaru.

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *