DOCUMENTU
SA BANDERA VERDADERA
DE SU POPULU SARDU EST SA LIMBA SUA
In ocasione de s’eletzione de Sergio Mattarella a sa càrriga màssima de sa Repùblica faghimus in primis sas bonas uras prus mannas e distintas pro custa funtzione dìliga nointamen su tempus siat grae e sa cunditzione econòmica trista.
Sos populos chi bivent in Itàlia ant bisòngiu de istitutziones democràticas fortes, ma a su matessi tempus liberales e democràticas, e finas de personalidades chi iscant cumpònnere s’autoridade cun sa tolleràntzia e sas netzessidades de su guvernu cun su rispetu de sas diversidades e de sas minorias. Nois isperamus chi su Presidente Mattarella at a chircare de sighire s’àndala pedrosa de su poderiu sena ismentigare custos cuntzetos polìticos e umanos de fundamentu.
Issu at a èssere pro sete annos su garante màssimu de sa Costitutzione e at tènnere su còmpitu de la fàghere aplicare a dovere sende chi custa Carta de printzìpios e de valores no est galu posta in contu comente si diat dèpere.
Ma nois non cherimus iscrìere a isse pro pedire gràtzia peruna o pro fuire dae Sardigna e nemancu pro chircare risu angenu. Nois cherimus ammentare a totus chi b’at deretos de rispetare chi non sunt rispetados.
Pro su chi pertocat a nois, difatis, lamentamus, comente parte de su pòpulu sardu chi bivet in intro de sos trèmenes de sa Repùblica Italiana, unu discuidu totale in contu de aplicatzione de s’artìculu 6 de sa Costitutzione, su chi narat chi sas minorias linguìsticas in Itàlia diant dèpere èssere amparadas.
Non pensamus chi su Presidente de sa Repùblica siat cumpetente pro detzìdere subra sa bandera de sos sardos e b’at gente in Sardigna chi no at galu cumpresu chi s’istendardu prus importante e distintu de unu pòpulu est sa limba sua. Nois pensamus chi sa Repùblica Italiana depat rispetare, paris cun sa bandera chi b’est, sa limba sarda e la depat promòvere comente de pagu at apostivigadu finas sa Cassatzione cun una sentèntzia.
Galu non semus lòmpidos a custu arribu ca in Itàlia b’at minorias chi non sunt in abbas malas, àteras chi sunt bardadas belle pagu e àteras, comente cussa sarda, chi sunt in arriscu de si nche mòrrere ca sas istitutziones (finas cussas sardas) non faghent su dèvere issoro. Sa Repùblica b’at postu chimbanta annos a lòmpere a una lege comente sa n°482 de su 1999 (chi at reconnotu su sardu comente limba de minoria istòrica) e galu, nointamen apat firmadu, no at ratificadu sa Carta Europea de sas Limbas cun sa cale si pigant impitzos solennes e vinculantes de amparu in cara a totu s’Unione Europea. In prus, sa lege 482 est aplicada pagu, male e no at a disponimentu resursas finantziàrias bastantes pro nàrrere chi sa Repùblica tutelat totu sas minorias suas.
E tando ammentamus, sena pomposidade nè artifìtziu, chi ognunu depet fàghere su suo cun s’autoridade chi at, pro pònnere unu mèdiu a custos disacatos e a non fàghere mancare a sa Sardigna e a sa limba sua unu alenu de libertade. E pro rispetare in fines una Costitutzione chi pro sos sardos no at mantènnidu su chi at promissu.
Si s’Istadu italianu no at a rispetare sa limba sarda nois l’amus a sinnalare a sas autoridades europeas e mundiales comente una violatzione de sos diritos linguìsticos de su pòpulu sardu.
Coordinamentu Sardu Ufitziale
Sardigna, 08.02.2015
Leave a comment
cherimus su sardu in iscola a paris gradu de s’italianu e sa bandera sa mantesi cosa!!!!!!!!!!!!!!!!!!
…e regularmente s’istadu derrutu e mafiosu italiacanicu,.at a lassare perdere,sena nde leare e tennere perunu cussideru…s’INDIPENDENTZIA DAE CUSTOS MUNTONARDZOS BI CHERET E BOH….