COMUNICADU
Su Coordinamentu pro su Sardu Ufitziale apostìvigat duas dies de mobilitatzione pro su 28 de onniasantu e pro su 8 de su mese de nadale a fines de sighire a denuntziare s’immobilismu de sa Giunta Regionale in contu de polìtica linguìstica.
Nointamen sas declaratziones contràrias s’istadu de sas cosas est semper prus grae e dannàrgiu. Su Servìtziu de sa limba sarda de s’assessoradu de sa pùblica istrutzione est semper sena diretore, su Pranu Triennale no est istadu aprovadu, s’Osservatòriu regionale no est cunvocadu, sos istantziamentos de su bilantzu 2014 segados in totu foras de s’Ufìtziu Regionale pro su cale esistiat un’òbligu contàbile. Sos ufìtzios linguìstico, nointamen sas promissas, ant pèrdidu sos contributos integrativos e arrriscant de serrare totus dae su primu de ghennàrgiu.
Non si connoschet galu su pensamentu de sa Giunta Regionale in contu de limba ufitziale standard sende chi su chi finas a como ses naradu est pagu, neulosu e finas cuntraditòriu. Si s’idea est cussa de torrare a dialetizare su sardu cun s’iscùsia de s’amparu de sas gasinaradas “variantes”, su guvernu depet ischire chi CSU s’at a opònnere cun totu sas fortzas suas.
Pro sa prima bia dae su 2009 su guvernu regionale no at asseguradu su finantziamentu a s’insinnamentu de su sardu in iscola in forma de sardu veiculare in su currìculu. Ocannu non s’at a fàghere mancu sa cunferèntzia annuale de sa limba sarda chi est obligatòria pro lege.
CSU denùntziat chi totu custas mancàntzias faghent pensare a un’idea negativa de su guvernu regionale in contu de avaloramentu e promotzione de sa limba sarda. Non si dat peruna prioridade a su tema de su bilinguismu e si cheret torrare agoa in sa polìtica linguistica de nessi deghe annos.
CSU aderit a sa manifestaztione de su 28 onniasantu in arborada Trento de s’assòtziu Aziru e proponet un’àtera die de mobilitatzione pro s’8 de su mese de Nadale.
Coordinamentu pro su sardu ufitziale
22.22.2014
Leave a comment