Collu (ProgReS): «Fintzas in is relatas internatzionales sa limba nostra est su sardu»

Collu (ProgReS): «Fintzas in is relatas internatzionales sa limba nostra est su sardu»

Sàbadu e domìnigu passados in su Tzentu de Cultura Bonnemaison de Bartzellona b’est istadu su cungressu internatzionale de Procès Costituent, sòtziu cadalanu chi traballat pro portare a in antis unu protzessu costitutzionale pro sa Repùblica Cadalana.

Intre is vàrios interventos dae medas natziones sena de istadu, sa delegatzione sarda fiat rapresentada dae ProgReS Progetu Repùblica, su partidu indipendentista chi a is ùrtimas eletziones natzionales sardas at tentu su resurtadu prus bonu.

Nde chistionamus cun su segretàriu natzionale nou, elèghidu in su cungressu de Maju, Gianluca Collu Cecchini:

Limba Sarda 2.0: Su segretàriu, fiat sa prima borta chi Vostè rapresentaiat sa Sardigna e su partidu suo in un’addòbiu internatzionale.

Gianluca Collu Cecchini: Eja, pro mie est istada un’emotzione manna, ma depo nàrrere ca ProgReS at semper donadu un’importàntzia manna a is relatas internatzionales. Pro nàrrere, giai in su 2011, a pagos meses dae sa nàschida de su partidu, una delegatzione de Progetu Repùblica aiat partetzipadu comente osservadore internatzionale a “Barcelona decideix”, su referendum consultivu pro s’indipendèntzia de sa Catalugna. In s’ùrtima campagna eletorale sa candidada nostra Michela Murgia est istada in Londra pro un’addòbiu cun is iscotzesos e in Bartzellona. In is Dies de Festa de ocannu passadu amus tentu che a òspite de onore sa parlamentare basca Laura Mintegi. E in custa de ocannu puru, chi s’at a fàghere su 6 e 7 de cabudanni in su Ghetu de is Ebreos de Casteddu, amus a tènnere unu momentu dedicadu a is polìticas internatzionales.

LS2.0: Cale est s’importàntzia de custos addòbios e comente podent agiudare a megiorare sa chistione natzionale sarda?

GC: Su cunfrontu cun is àteras esperièntzias internatzionales est fundamentale pro agatare solutziones bonas fintzas pro sa Sardigna e a s’imbesse est importante meda a fàghere connòschere sa situatzione sarda pro tènnere s’agiudu de is àteros pòpulos cando nde amus a tènnere bisòngiu in s’àndala pro sa defensa e sa conchista de is deretos natzionales nostros. Pro custu, in su mentres chi is partidos dipendentistas che a PD e Forza Italia impare a totus is alleados issoro andant a Roma a pedire dae su guvernu italianu una cadena pagu·pagu prus longa, nois sighimus a traballare e andamus a chistionare e nos cunfrontare cun chie cussas cadenas ddas bolet tirare a s’àliga e bìvere in libertade.

LS2.0: Sa relata sua est istada iscrita e at a èssere posta in is atos de su cungressu in chimbe limbas (sardu, inglesu, cadalanu, ispagnolu e italianu) e dd’at lèghida in sardu, mancari Vostè non dda tèngiat che a limba mama. Ite cosa custu sèberu?

GC: Amus pensadu ca fessit cosa de importu mannu ca totus is reladores e is partetzipantes a su cungressu podessent cumprèndere in sa limba issoro su contributu nostru, pro custu amus pensadu de bortare sa relata in inglesu, ispagnolu, cadalanu e italianu. A su pròpiu tempus est importante afirmare ca fintzas in is relatas internatzionales sa limba nostra est su sardu. Apo seberadu de lèghere sa relata in sardu, fintzas si m’est essida carchi faddina de pronùntzia, ca su sardu e is àteras limbas natzionales nostras sunt sa sienda culturale prus manna chi tenimus e duncas est pretzisu a ddas impreare e a ddas fàghere a connòschere su prus chi faghet e prus che totu in is cuntestos internatzionales.

LS2.0: Vostè est unu “neo-faeddante” e at seberadu de iscrìere e de lèghere sa relata sua sighende s’istandard de iscritura de su sardu.

GC: Est berus, in domo non apo tentu sa possibilidade de dd’imparare, e in is annos de sa formatzione mia fintzas in sa sotziedade (pro non chistionare de s’iscola!) su sardu fiat pagu impreadu. Apo torradu a castiare prus acanta a sa chistione linguìstica gràtzias a s’impignu polìticu. Depo nàrrere ca in custu m’at agiudadu meda sa polìtica linguìstica de ProgReS, chi reconnoschet su balore de su plurilinguismu e sa dignidade a totus is limbas chi si faeddant in Sardigna, ma chi pròpiu pro custu traballat pro donare a su sardu e a is àteras limbas chi, a dolu mannu, oe sunt minorizadas, totus is ainas pro torrare a èssere limbas normales impreadas in totu sa sotziedade. Ca che a sardos est unu dovere nostru a donare a is generatziones noas su chi a sa nostra e a is chi sunt bènnidas prima est istadu negadu. E pro torrare a su contu de s’istandard, creo ca custu siat un’aina fundamentale siat pro is neo-faeddantes che a mie, che pro is pipios e is iscolas, ma prus in generale pro totu sa limba e is sardos-faeddantes. A mie m’at agiudadu meda a tènnere règulas pretzisas e ainas che a libros, sitos, vìdeos, etc. chi sighint un’istandard, in manera dae pòdere imparare prus a lestru, fintzas a mannu, sa limba sarda.

LS2.0: Gràtzias meda e isperamus chi in medas ant a sighire s’esempru bostru de faeddare e iscrìere in sardu in totue.

GC: Gràtzias a bois, bonu traballu e fintzas a sa Repùblica!

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *