Brigàglia contra a Soru e a Pigliaru, ma pro resones opostas

Brigàglia contra a Soru e a Pigliaru, ma pro resones opostas
Manlio Brigaglia in unu retratu leadu dae www.sassarinotizie.com
Manlio Brigaglia in unu retratu leadu dae www.sassarinotizie.com

 

Pustis Màssimu Pittau, un’àteru dinosàuru de s’orientalismu s’est torrende a si fàghere bìdere e a isconchinare. Manlio Brigàglia, acadèmicu pedrale de s’universidade turritana, oe in La Nuova Sardegna pro chistiones de limba, atacat a Soru e a Pigliaru, ma pro resones chi si controint a pare.

Su professore, “espertu” de totu su chi est sardu, at respostu in su cuotidianu “La Nuova Sardegna” de oe a una lìtera de Salvatore Bovore Mele (ativista CSU) chi, movende dae s’esempru de sa Còrsica, criticaiat universidade e regione pro su nudda chi sunt faghende pro sa limba. Prus a finu, Mele (chi est unu militante PD) at fatu notare comente Renato Soru e sos àteros polìticos de manca presentes in giunta podiant fàgher de prus pro chistire e avalorare sa limba standard de su sardu.

Sa resposta de Brigàglia (a pag. 17) est unu cabu de òbera de polìtica orientalista e fraitza (furba, matzonina) de sos acadèmicos sardos chi ant cuntierradu pro 40 annos contra s’ufitzializatzione de sa limba. In s’isterrida de sa resposta difatis paret chi siat de acordu cun Mele e acasàgiat bona parte de sas tesis cosas suas narende chi in Còrsica emmo chi faghent polìtica linguìstica, mentres sa polìtica nostra non balet a nudda.

In sa metodologia orientalista custa est semper sa parte de ‘captatio benevolentiae” pro trampare cussos chi sunt in favore de sa limba a fines de los imboligare e collonare. Posca però narat chi Soru at traballadu meda ca at fatu sa Limba Sarda Comuna. Ma lu atragàgiat ca, a bisu de su professore chi iscriet a fitianu in italianu, cussa matessi limba no est nen “sarda” nen “comuna”.

In segus Brigàglia colat a faeddare de su presidente de sa regione de como e li narat lenu lenu, ma acutzu :<con la giunta Pigliaru il discorso non è stato ripreso, e la vaga aurea economicistica che avvolge il governo della Regione fa temere che della lingua si parlerà sempre meno>. Curiosu chi iscudat a unu ca at fatu e s’àteru ca no est faghende.

Bortadu dae su suspu acadèmicu-publitzìsticu custu arresonu controidu e chi paret ghetadu a pare, est unu messàgiu a finu a finu chi torrat a contu bene finas cun sas essidas anti lsc de Pittau. Si narat a manera cuada chi como chi s’acadèmia est guvernende in Regione sos pragheres fatos depent èssere torrados. Su guvernu regionale si depet impitzare de limba a tales chi sa Lsc siat burrada e si torret a s’orientalismu colonialista de sos dialetos-variantes. Su dinare non depet èssere istrinadu a cussos chi traballant pro sa limba bia, ma a sos ateneos chi istùdiant sa carena e sos mermos de una limba morta.

E si cumprendet chi si Pigliaru e amigos non faghent custu ant a tènnere contras sos dinosàuros pedrales de s’acadèmia. Semper chi siant galu a manera de los truvare. Est a òbligu a regordare chi Brigàglia aiat partetzipadu un annu a como in La Nuova a sa campagna contra a sa Lsc, cun s’iscusa de atragagiare su libru “Il sardo una lingua normale” e s’autore suo. Ma mescamente est pretzisu a ammentare   chi in campagna eletorale, dae sa prima pàgina de La Nuova Sardegna, aiat sustènnidu sa candidadura de Pigliaru iscriende, in mesu de àteras cosas, chi aiat “su sambenadu pretzisu pro guvernare”. Sinnu distintu de reconnoschimentu intro su mundu de sas oligarchias. E como dae sas  matessi èlites lompet pero s’imbiada in suspu.

Unu disinnu de “aficu” meda como chi Pigliaru, pro timòria de Soru e pro s’abolotu chi at pesadu su Coordinamentu Sardu Ufitziale, est custrintu – ma petzi a paràulas ca est  isetende àteras ocasiones –  a si nche ingurtire sa Lsc. Sende chi Brigàglia est istadu unu de sos innimigos istòricos (e finas unu de sos prus matzones) de su bilinguismu in Sardigna, at a èssere unu praghere a contare comente s’at a isboligare custa Brigaglieide anti Pigliaru e anti Lsc in custos meses….

 

 

(dir)

Leave a comment

2 Comments

  1. …E A CHIE LEAT IN DZIRU A TOTUS…
    A ITE CREET DE ESSER ???

Send a Comment

S'indiritzu email tuo no at a èssere publicadu. Is campos pedidos sunt signados *