-de Sarvadore Serra-
Chi sa festa de su Sardu Ufitziale de Bonàrcadu est istada un’èsitu mannu lu narant sos fatos, no lu naramus nois. Ma su chi ispantat no est su fatu chi b’apat acudidu unu muntone de gente, nen sos interventos cualificados de polìticos, intelletuales, ativistas de su movimentu linguìsticu.
Sa novidade manna de custa editzione est s’esplosione de su digitale. In una sutzessione ràpida, chi diat ingaddinare a chie si siat, amus bidu su “Digital Language Project” de su CNR”, in ue b’est fintzas su sardu, “Sintesa”, primu sintetizadore vocale de su sardu, su tradutore automàticu sardu-italianu de Giuanne Frantziscu Fronteddu, Facebook in sardu, sa rivista digitale in sardu Limbasarda 2.0., “Scratch”, unu programa de animatzione pro pitzinnos cun sos cumandos in sardu, “Seo”, unu progetu pro faeddare de sa Sardigna cun sos datos abertos.
Como, sos chi sunt contràrios a su sardu ufitziale carchi problema si lu devent pònnere. E fortzis devent pònnere in discussione carchi istereòtipu.
Sos de movimentu linguìsticu sunt estremistas? Nono, sunt pessones normales, chi faghent una vida normale e istimant sa terra issoro.
Sa limba sarda est sìmbulu de arretratesa? Nono, in custos annos su sardu s’est fatu tzitadinu de su mundu digitale.
Tocat a sarvare sas variedades? Eja, ma in sa comunicatzione moderna non si podet fàghere a mancu de un’istandard.
E tando? E tando, eja, sas cosas si sunt ponende in bonu. Sos chi ant leadu parte a sa festa ant a sighire cun su traballu issoro galanu. Ma b’at de si pregontare si sas istitutziones regionales ant a fàghere sa parte issoro in custa pelea. Si no àteru, pro tènnere contu de sas leges de sa Repùblica.
In primis, s’artìculu 6 de sa Costitutzione, chi tutelat sas minorias linguìsticas, e sa Lege 482 de su 1999 subra de sas minorias linguìsticas, chi leat in cussideru fintzas su sardu.
Ite nàrrere de prus? Isperemus chi sas cosas sigant a megiorare.
Leave a comment