Su cursu, chi s’at a pòdere sighire in sa sede natzionale de su partidu in sa carrera Tèmpiu 27 de su bighinadu de Biddanoa in Casteddu, o in internet cun unu sistema de imparu in lìnia (in su giassu www.impreasalimba.net), est apertu a totus e est adatu fintzas pro chie no ischit nudda de sardu, giai ca at a cumintzare dae su livellu prus bassu.
Segundu is organitzadores: «”Imprea sa Limba” impreat una manera noa de imparare su sardu, ponende pro primu cosa s’impreu pràticu de sa limba.» Duncas unu cursu chi punnat a «imparare a fàghere unu discursu pùblicu, a iscrìere unu curriculum, a imbiare un’email, a lèghere unu romanzu, a preguntare unu cafè a su bar, e aici sighende.»
Is interessados si podent iscrìere a su cursu pro mèdiu de su giassu internet de su cursu.
S’oràriu at a èssere publicadu in pagu tempus in base a is sèberos de is iscritos.
Leave a comment