Àera noa in Cabuderra. Sàpadu cunvegnu linguìsticu e culturale

Àera noa in Cabuderra. Sàpadu cunvegnu linguìsticu e culturale

Christian Ruiu

Cabuderra si torrat a ghetare a una polìtica linguìstica e culturale prus aberta. Pustis sos annos de su separatismu linguìsticu, de fronteras e fortilesas immaginàrias, de s’arrenegu contra a sa Sardigna, s’amministratzione comunale est chirchende como de torrare a iscampiare sas fentanas pro fàghere intrare àera noa.

Sàpadu, in mesu a milli àteras manifestatziones culturales (e finas una note bianca pro su cummèrtziu) pro inghitzu de su cussigeri comunale Cristian Ruju, s’at a fàghere una mesa de arresonu de importu in ue s’at a proare a torrare a tèssere sa trama de s’identidade de una bidda-tzitade chi pro meda tempus est abarrada a banda de sa cultura isolana.

A sas chimbe de merie de sàpadu 6 de Cabudanni, polìticos, intelletuales e operadores s’ant a cunfrontare subra su tema ‘Limba Sarda. Traditzione e anoamentu in sa polìtica linguìstica’. A animare e cumpònnere su dibàtitu, s’amministratzione at tzerriadu a Giuseppe Corongiu e a Bustiano Pilosu. E difatis in su programma si leghet chi sos temas printzipales de s’arresonu ant a èssere su libru de Coròngiu ‘Il sardo una lingua normale’ e ‘S’importàntzia de su cantu in sa cunservatzione de su sardu’. Duncas, no ant a mancare sas ideas e finas su cunfrontu.

Cumbidados a partetzipare a sa mesa paritzos òspites: Salvatore Sarigu, Marco Monni, Mariangela Marras, Tonino Arcadu, Mondo Perra, Simone Atzeni e Piero Comandini.

In programa finas sa partetzipatzione de sos assessores e de sos cussigeris comunales. Totu at a comintzare cun s’isterrida de Cristian Ruju. S’at a finire cun una pesada de boghe de su tenore Montarbu de Tiniscole e cun sa tastada de binos de sa cantina de Uliana Gostolai.

Unu merie e sero de non pèrdere duncas ca ponende paris totu custos elementos nd’at essire de seguru una resessida bona. Posca chi Cabuderra fiat divènnida una fortilesa iscuriosa de sos chi cherent partzire sa Sardigna in chirros s’unu contra a s’àteru, como naschet s’ispera chi si potzat traballare in paghe e armonia.

Sos sardos de cada logu, paris che frades.

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *