Sa die de sa fèmina est festegiada in totu su mundu, cada annu ammentamus sas conchistas sotziales, polìticas e econòmicas de sas fèminas, ma finas su pore de sos problemas chi las anneant, che a sas discriminatziones e a sa violèntzia chi a fitianu las giagarant.
Ma bi sunt finas violèntzias prus pagu ladinas, “subliminales” (pro impreare una paràula italiana), che a cussa de negare sa limba nadia pro èssere modernas e galanas, pro àere prus possibilidades de traballu e no abbarrare acorradas in su fòghile…
Leghide su chi Pepe Coròngiu at iscritu in Facebook
Fèminas, s’oto de martzu torrade a faeddare in sardu. Unu pagu nessi. Liberade.bos dae s’òbligu de èssere semper “carine” e de non pòdere impreare sa limba de sos grezos. Iscapiade.bos.
Torrare a faeddare in sardu est una liberatzione non petzi polìtica e sotziale, ma finas individuale e de gènere.
Sas fèminas difatis ant patidu prus de is òmines s’impositzione linguìstica de s’italianu ca depiant èssere a mala bògia belligheddas, allichididas, ‘carine’, e non depiant faeddare su sardu, sa limba de is ‘grezos’ assugetados.
In prus de sa prepotèntzia natzionalista, cussa de sos mascros.
Ite liberatzione e emantzipatzione mègius de torrare a faeddare sa limba proibida?
Pepe Coròngiu