Polìtica linguìstica: chimbanta annos e non los mustrat

“Chimbanta annos de polìtica linguìstica in Sardigna: dae sos primos passos a oe” est su tìtulu de s’addòviu chi s’at a tènnere in Tàtari in su “Villino Ricci” domìniga 23 de Santu Gaine a incuru de s’Istitutu Camillo Bellieni. Movende dae sas 9 de mangianu, s’ant a cunfrontare paritzos esponentes de su Movimentu Linguìsticu chi ant a chircare de fundare una lìnia noa, sende chi in Tàtari b’at àpidu de reghente fatos graes e de significu.

Sa cuntierra chi custa istade at bidu in batalla s’Universidade locale contras a su Movimentu Linguìsticu, at lassadu rastros de amargura e arrenegu chi galu sunt presentes in intro de sas fileras de su Comitadu de sa Limba sarda e de àteros sòtzios. Ma, a banda sas titiriteras de sos innimigos de semper de sa limba sarda, su Movimentu at a chircare de castiare a segus pro chircare de fàghere unu bilantzu de custos primos chimbanta annos de polìtica linguìstica.

Sa punna est semper però de disinnare su tempus benidore.

In su cumbidu sunt in programa sos interventos de Sergio Milia, assessore regionale de sa cultura, Bruno Farina, assessore provintziale de sa matessi matèria, Antonieta Dettori, acadèmica de s’ateneu de Casteddu, Anoni Canalis, segretàriu de su prèmiu Otieri, Diegu Corraine (ativista istòricu de su Movimentu, Mario Carboni (prima boghe de su Comitadu pro sa Limba, Efisio Planetta (consigeri regionale de su Partidu Sardu, Giuanne Frantziscu Pintore (iscritore), Antoni Maria Pala (iscritore), Maria Antonietta Piga (diretora de s’Ufìtziu Limba Sarda de sa provìntzia de Nùgoro), Daniela Masia (operadora de ufìtzios de sa limba), Frantziscu Casula (intelletuale), Micheli Pinna (presidente de su Bellieni), Alberto Contu (sagista), Pàulu Pillonca (iscritore e giornalista) e Frantziscu Cheratzu (editore).

Sas chistiones in campu sunt custas:

  • Su servitziu limba sarda est chentza de diretore.
  • Nudda dinari in sa finantziaria.
  • Nudda dinari in su collegadu.
  • Ant firmadu is isportellos.
  • Est firma sa formatzione de is insegnantes.
  • Ant firmadu sa sperimentazione de su sardu curricolare in is iscolas.
  • Est firmu su curretore ortogràficu.
  • Aici etotu s’atlante.
  • Firmas puru is trasmissiones televisivas, radiofòicas, web e giornales.
  • Nudda cunferentzia annuale.
  • Peruna disponibilidade, pro como, a superare sa barriera de s’1% de su bilanciu de destinare a sa limba.

Gia bi nd’at pro sos chimbanta chi ant a bènnere puru.

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *