Pasada prèmiat su romanzu in LSC de Jubanne Piga ‘Sa vida cuada’

Piga3IMG_5387

Est ‘Sa vida cuada’ de Jubanne Piga su romanzu in sardu binchidore de su prèmiu literàriu ‘Casteddu de sa Fae’. Custu merie in Pasada, in una manifestatzione pùblica in presèntzia de su sìndigu Roberto Tola, su comitadu organizadore, chi at torradu a nou su prèmiu a pustis de deghe annos, at ufitzializadu sa noa e mustradu sos primos chentu libros imprentados de su romanzu.

S’autore, in un’interventu a fines de sa presentada, at comunicadu chi su libru est iscritu segundu sas règulas de sa Limba Sarda Comuna. <Apo iscritu 40 annos in nugoresu -at acraridu s’iscritore chi est finas unu de sos poetas prus connotos in Sardigna – ma cheria lassare cun cust’òbera calicuna trata iscrita in sardu pro sas generatziones de su tempus benidore>. Custa atzione de coràgiu no at a mancare de fàghere resonare meda de custu libru e de sa capia sua, sende chi s’est semper naradu chi s’impreu de unu standard, in una limba minore, est un’atu de generosidade.  

Jubanne Piga, nugoresu, est naschidu in su 1940. At iscritu paritzos volùmes de poesia de sos cales ‘Su dùbbiu de s’ànima’ est unu de sos prus connotos. “Sas àndalas de su tempus” est un’àtera òbera chi est nomenada in totu sas istòrias de sa literadura sarda.  At dadu impèllida manna a sos prèmios literàrios Barbàgia e Sant’Antoni de su fogu de Mamujada, e at otentu reconnoschimentos e prèmios in totue pro literadura e teatru. Est finas giornalista publitzista. Oe est de seguru una boghe de importu mannu de sa literadura in limba sarda chi cun custu romanzu at marcadu unu passàgiu istòricu pro sa prosa in limba sarda. Pro su comitadu, in sa Domo de sas Damas de sa bidda baroniesa, ant faeddadu finas Diegu Corraine e Angelo Canu.

(redatz)

Unu Cummentu

  1. Giannetto Lapia says:

    Grande artista de operas sanas!!!

Lassa unu cummentu

S'indiritzu email tuo no at a èssere publicadu. Is campos pedidos sunt signados *

*

shared on wplocker.com