In su 1978 si faghiat festa pro sos trinta annos de autonomia. Ma su giornale “Su Populu Sardu” naraiat chi non b’aiat nudda de èssere cuntentos. Pro ite? Ca su 1978 fiat un’annu che a un’àteru, cun lissentziamentos, disterru, distruimentu de s’ambiente, ocupatzione militare de su territòriu. De chie sa neghe? De su domìniu coloniale de s’Itàlia capitalista in terra nostra, eja, ma fintzas de sas classes dirigentes sardas.
Custu artìculu est unu cabu de òpera minore de prosa polèmica; a dolu mannu, no est firmadu, e duncas no ischimus chie l’at iscritu.
————————————————————————————————–
In 30 annos
de autonomia
SEMPER PRUS COLONIA DE S’ISTADU ITALIANU
Ocannu pro nois est un’annu che un’ateru: annu de lissentziamentos, de disocupassione, emigrassione, isbandonu e distruimentu de sos traballos e produtos nostros, de rapina de risorsas umanas e materiales, de ocupassione militare de su territoriu nostru, de dominiu de sa curtura capitalista chi dae sas televisiones e radios e iscolas nos est furriende su cherveddu.
Ca custa est sa beridade: chi semus una colonia, una nassione oprimida, e no una “regione” de s’istadu italianu.
Tzertu no amus a narrer chi totu sos dimonios benin dae su mare, non chi totu sa neghe de sos males nostros la tenet s’Italia. In Sardinna etotu che at una chedda de istipendiados chi amministran e mòrigan sa Sardinna a contu de s’Istadu Italianu, de su “Mercato Comune”, negussiendesi Sardinna e Sardos a donzi culu de cane de capitalista, faghinde su chi lis daen a fagher dae Roma e dae Brusselle. Si bidet chi bi mossigan in grussu, ca si nono, sende chi issos etotu faghen sa frigura de sos buratinos, leados a fune chi petzi lis mancat su picarolu, aian comintzadu a pessare issos puru chi sa “Regione Autonoma” servit de ingranazu pro noche agabare faghindelu moer cun sas manos “nostras” etotu, ca sa “Regione” no est àteru si non sas ungras de sa burghesia Italiana e de s’Europa in purpas nostras. E gai it’an fatu sos de sa “Regione Autonoma” cando su guvernu italianu at bèndidu sa Maddalena a sos Americanos? An fatu su chi los an postos a fagher: unu telegrama!
It’an fatu cando su guvernu italianu at serradu sas mineras? An fatu su chi los an postos a fagher: propostas!
It’an fatu cando s’Istadu italianu che at bogadu mizas de milliardos de minerales? An fatu su chi los an postos a fagher: sinde sun alligrados!
It’an fatu cando su guvernu italianu nos at isgarriadu bator petrochimicas? An fatu su chi los an postos a fagher: sinde sun alligrados!
Ite sunt faghinde como chi sos disocupados si sun moinde pro si ponner a travallare? Sun faghinde su chi los an postos a fagher, e bollu contamus: sas Comunas an presentadu a sa “Regione Autonoma” 774 prozetos pro ponner a triballare noe miza zovanos cun 45 milliardos de ispesa. Ma dae Roma b’est s’ordine de nd’atzetare pagos, barantatres! pro ocupare 4467 zovanos cun 26 milliardos de ispesa. Ma no est finida gai: dae Roma an torradu a telefonare, nende chi pro sa Sardigna an dadu petzi treighi milliardos! E tando? Innantis si che sun isfutidos faghinde sos contos a chimbe bortas, comente assuprian sos ordines dae Roma, e como los an a fagher torra, an a atzetare petzi 21 prozetos pro ocupare unos duamiza zovanos, de prus de trintamiza chi nde tenimus disocupados!
Ca su contu de su guvernu italianu no est de ponner sos zovanos a travallare e produire, ma de nde ocupare pagos, su prus pagu possibile e in cosas chi non produin unu bellu nudda, comente sun sos chi issos naran “servizi”.
(a incuru de Sarvadore Serra)
Leave a comment