Syntax II, pro minimare sos interventos de cardiochirurgia

 

de Sarvadore Serra

Un’istrategia noa de tratamentu percutàneu –colende in sa pedde- permitit de minimare su nùmeru de interventos chirùrgicos pro sos malàidos de coro. Est su chi resurtat dae un’istùdiu presentadu in s’ùrtimu Cungressu Europeu de Cardiologia fatu in Bartzellona.

Cunforma a su chi b’at iscritu in unu comunicadu, dae s’istùdiu ‘Syntax II’ resurtat chi custa tècnica èvitat sos interventos non netzessàrios in prus de su  30% de sos vasos coronàricos  interessados.

Su dutor Javier Escaned, de s’Ospidale Clìnicu Sant Carlos de Madrid, unu de sos chi ant fatu s’istùdiu, narat chi su ‘Syntax II’ dat una prospetiva “de comente megiorare su tratamentu  de sos patzientes si s’ìntegrant sos avantzamentos  in su setore”,  crarende chi “Si b’at manos espertas  e si s’impitant tècnicas ispetzìficas, si podet otènnere unu tassu artu meda  de resurtados bonos  in sas oclusiones coronàrias  crònicas, frecuentes meda in sos patzientes, e chi mòtivant, in ocasiones medas, su sèberu de sa chirurgia cardìaca comente tècnica de tratamentu”.

De totu sos malàidos chi sunt istados interessados dae s’istùdiu, petzi su 37% at tentu tratamentos in sos tres vasos coronàricos, e custu at simplificadu  sos interventos  e at istransidu sos perìgulos chi nde podiant bènnere.

In prus, su tratamentu de sas oclusiones coronàrias crònicas at cunsighidu una pertzentuale de resurtados bonos de su 87% in s’impreu de  tècnicas modernas  dae bandas de  operadores espertos.

S’istùdiu ‘Syntax II’ at interessadu 22 tzentros europeos, in un ue ant analizadu sos datos de 465 patzientes, cun sa ghia de Javier Escaned e de Adrian Banning, de s’Ospidale John Radcliffe de Oxford, Rennu Unidu.

Ligàmenes: http://www.vilaweb.cat/noticies/una-nova-estrategia-permet-reduir-la-cirurgia-en-afectats-per-malaltia-coronaria/

http://thecardiologist.co.uk/

http://www.ecri-trials.com/faculty/javier-escaned/

Lassa unu cummentu

S'indiritzu email tuo no at a èssere publicadu. Is campos pedidos sunt signados *

*

shared on wplocker.com