Eris in su Facebook de Bartolomeo Porcheddu, editore de sa revista Logosardigna, est cumparta custa delìbera regionale iscrita in sardu. In su progetu Iscol@de sa Regione, unu muntone de dinare pro totu, ma de sardu non b’at nudda, e tando Porcheddu at iscritu sa delìbera chi depiat èssere istada iscrita in logu de cussa verdadera, Una delìbera chi depiat èssere normale inuna Sardigna normale.Ma imbetzes… Leghide-la.
PROPOSTA DE DELIBERA PRO SA BONA ISCOL@ SARDA
PROPOSTA DI DELIBERA PER LA BUONA SCUOL@ SARDA
(Traduzione in italiano dopo la delibera in sardo)
SA DIRETORA DE SU SERVÌTZIU
BIDA sa proposta de iscola sarda pro su tempus benidore presentada dae su pòpulu sardu in s’andera de su mandadu istituzionale suo chI l’at cunferidu sa natura pro èssere soberanu in su territòriu de sa Sardigna e èssere deputadu pro lege a numenare sos amministradores suos;
LEADU ATU chi sa disocupatzione giovanile est bènnida a èssere in Sardigna unu perìgulu mannu in cantu unu giòvanu subra duos est chentza traballu e chi su personale de s’iscola sarda est como agiummai dae annos andende e miminende;
CUNSIDERADU chi sa dispèrdida iscolàstica ponet sa Sardigna a su primu postu in Italia e a sos primos postos in Europa, in cantu unu giòvanu subra bator abbandonat in antis de s’ora sos istùdios, e s’inditat sa neghe printzipale in su fatu chi s’iscola sarda est a tesu dae sa realidade territoriale sua;
CUNSTATADU chi su modellu de iscola italiana centralizada cun programmas ministeriales uniformes no est bona pro realidades perifèricas e particulares comente sa Sardigna, in ue un’istudente chi agabbat sos istùdios non tenet peruna preparazione, francu in raros casos, de limba, literadura, istòria, geografia, iscièntzias, arte, mùsica e àteru de sa Sardigna;
ABBERADU chi pro sas materia naradas subra, dae su mamentu chi sas matessi non sunt a parte intro de programmas iscolàsticos, no esistit peruna produtzione librària distinada a sas iscolas, chi imbetzes diat àere dadu a sa Sardigna postos calificados de traballu (professores, chircadorres, autores, editores, imprentadores e àteru), e diat àere abertu a sos istudentes sos ogros de sa connoschèntzia dae su generale a su particulare;
ATZERTADU chi unu pòpulu non podet bìvere in sintonia cun su pròpiu territòriu si non nde connoschet cada bisura sua e ogni potentziale e reale resorsa culturale, e pro tantu econòmica, che li garantat unu progressivu isvilupu de lassare a sas generatziones chi ant a bènnere;
RELEVADU chi in Sardigna esistit unu patrimòniu de benes culturales, archeològicos e naturales de inestimàbile balore chi podet èssere abbaloradu in antis de totu cun sa connoschèntzia e s’istùdiu iscientìficu in sas iscolas de ogni òrdine e gradu e in sas universidades;
DELÌBERAT
Pro sos motivos narados subra:
- de distinare a su progetu “Iscol@” sarda sa summa cumplessiva de 720 milliones de Euro pro sos tres annos 2015-2017;
- de tale summa ant a èssere impignados pro s’annu in andera 185 milliones, gosi partzidos: 15 milliones pro megiorare s’aprendimentu, 40 milliones pro sa dispèrdida iscolàstica (chi dae como in antis s’at nàrre “sa bona iscola sarda”), 130 milliones pro interventos in s’edilìtzia.
- Sos 15 milliones deliberados pro s’aprendimentu ant a èssere distinados a s’assuntzione de professores, a sa formatzione o recualificatzione issoro in matèrias chi pertocant sa limba e sa cultura de sa Sardigna.
- Sos 40 milliones istantziados pro “sa bona iscola sarda” sunt gosi partzidos: 20 milliones pro sas famìlias de istudentes in dificultade econòmica; 3 milliones pro sa limba sarda; 4 milliones pro sa cultura sarda; 5 milliones pro su materiale de istùdiu; 3 milliones pro s’aprendimentu de limbas e culturas istràngias pro mèdiu de cumbentziones cun iscolas e universidades de àteros paeses (ca sa limba s’imparat in su paese de orìgine).
SA DIRETORA DE SU SERVÌTZIU
Dut.ssa Dea Mama
Leave a comment