Anthony Muroni, diretore de L’Unione Sarda, eris cun unu post in Facebook at fatu connòschere sas ideas suas in contu de bilinguismu, classe dirigente e autoguvernu de sa Sardigna. Paràulas fortes e chi in capas mai si fiant intesas a unu giornalista cun custa responsabilidade.
No est sa prima bia chi su diretore, nàschidu in Perth (Australia) ma de ratza de Tresnuraghes, faeddat gasi làdinu, ma de seguru, est una de sas primas chi ponet gasi a prope su pensamentu suo a cussu de su babbu mannu de s’indipendentismu e de su bilinguismu Antoni Simon Mossa.
“Sena sa limba sua unu pòpulu est mortu. E s’autonomia culturare est de òbligu – at iscritu in su perfilu de Facebook – pro costoire e fàgher bìvere unu pòpulu. Sa limba est unu fatore base pro s’autonomia culturale e custa est sa madrighe de sa libertade, de s’indipendèntzia e de su riscatu sotziale e economìcu de unu pòpulu. E dae s’annuddamentu de s’autonomia culturale protzedit cada coloniasmu”.
S’arresonu de sa ghia de su giornale prus importante de sa Sardigna, sighit cun pensamentos prus polìticos. “Su problema nostru? Una classe dirigente fìgia de una neoborghesia intelletuale disonesta, sena initziativa, antiga e discapatza, semper a tretu de serbire in cada ocasione. Una classe dirigente ausente, una classe polìtica dèbile e insufitziente, un’istrutura de istadu dominante e una discapatzidade de autoguvernu in totu. E duncas de autonomia”.
In custas dies su cuotidianu de Casteddu at propostu a sos letores suos unu libru cun sas òberas, arresonos e sas ideas de Antoni Simon Mossa, ma non paret chi pro su diretore custa siat istada petzi una faina cumertziale. “Custu est su pensamentu de Simon Mossa – serrat Muroni – e deo nde cumpartzo finas sas molècolas”.
No est cosa de pagu contu o de colare sena atentu su chi at iscritu su diretore de Tresnuraghes. Nono.
gc
Leave a comment