de Giuseppe Pepe Coròngiu
Su fùbalu est unu giogu ebbia, si narat. No est gasi de importu. In medas l’isnobbant finas, ca est unu isport popolare meda, non de élite. Paret una cosa chi non nde balet su tantu a nde faeddare. Ma a mie m’at dadu infadu meda, sende chi so andadu cun fìgiu meu a bìdere sa partida Casteddu-Juve, de bìdere in ie in s’istàdiu sardos meda tirende contra a s’iscuadra de sa capitale. E ofendende sos tifosos de su Casteddu. E esultende pro su disacatu sardu e casteddaju.
Sende chi sa partida est finida 3 a 1 pro sa Juventus cun meritu, ca su Casteddu ocannu no est a manera. Sende chi ognunu podet e depet fàghere su chi creet e bolet, sa cosa m’at postu tristura. E mi so dimandadu: ma normale est chi si tiret gasi pro banderas e colores angenos? Si faghet in cada logu in su mundu? Est una maladia sotziale serente a s’autòdiu e a su fatu de refudare s’identidade pro autocolonialismu? So deo pìsile a custu ca so unu natzionalista sardu o b’at problemas in segus? Nde fatzo una cosa manna cando est unu nudda?
Chèrgio nàrrere normale est chi sardos medas tirent pro Juve, Inter e Milan sende chi non creo chi b’apat torinesos o milanesos chi siant in favore a su Casteddu? E forsis si diat pòdere nàrrere chi est una manera de si abèrrere a su mundu ca est provintziale meda a tirare pro un’iscuadra de s’isola?
E però tando pro ite nemos tirat mai pro iscuadras chi sunt fortes, ma non sunt italianas? E pro ite nemos pro iscuadras italianas chi non sunt fortes e binchidoras? Pro nàrrere su Sassuolo o su Chievo non mi paret chi las sigant…
A mie mi paret chi su provintzialismu (patològicu?) est in tamen cuddu de tirare pro sas iscuadras italianas fortes. Ca est una manera de si intèndere binchidores, mancari essende sardos ( e duncas destinados a pèrdere). Unu provintzialismu verdaderu.
Mi paret una manera de nde essire dae una realtade chi non praghet, chi non si atzetat. Comente una gratificatzione infantile chi non si issorvet…
E bos conto chi fiat lègiu bìdere custos sardos ofèndere sos àteros in s’istàdiu comente chi issos esserent istràngios in domo angena. Una maladia. Unu machìmine chi simbolizat sa realtade alienada de sa popolatzione sarda de oe? E sos sotziòlogos si nde diant dèpere impitzare?
Forsis so deo chi nche faddo e su fùbalu, in fines, est unu giogu ebbia. Lassamus pèrdere.
Leave a comment
Beh, deo ammito de fagher parte de cussos chi si nde frigant de su totu ca su fùbalu non mi interessat pro nudda, ma cando intendo custas cosas mi dispiaghet meda pro rejones umanas: tando, pro su fatu de tirare pro una o pro s’àtera iscuadra non creo chi si nde potzat fàghere una chistione de logos: mi paret normale chi sa majoria de sas pessones tiret pro sas prus fortes, siant issas sardas o istràngias. Comente si siat creo chi su tifu apat pagu ‘e ite fàghere cun sas rejones de identidade. Custu balet pro ogni cosa e…penso sia giustu gasi. Fintzas pro s’amigàntzia e s’amore est naturale chi si depat abbaidare a fora dae sos logos in ue si vivet, sinono nos diamus serrare intro a nois. Si su Casteddu esseret tiradu dae sos casteddaios ebbia, su Milan dae sos milanesos ebbia e gai sighende, bi diant èssere iscuadras mannas cun miliones de tifosos e iscuadreddas minores cun pagas chentinajas e…custu non diat fàghere àteru chi crèschere sas diferèntzias tra sas iscuadras e e tra sas pessones imbetzes de acossiare totus, gasi comente s’isport diat dever fàghere. Naradu custu mi paret de su totu isballiadu chi su tifu finat cun machìmines e mancàntzia de rispetu ca, comente apo iscritu, custu non giughet àteru chi brigas e cosas feas chi faghent pèrdere sa finalidade ùnica de s’isport chi diat dever èssere cussa de fagher intèndere totu amigos e diat dever fagher imparare a sa gente si’importàntzia de su rispetu. Su fùbalu est unu giogu ebbia, ma su rispetu benit a primu de ogni cosa!
Bravu Pepe, su c’as iscritu m’aggrada meda, bravu.
E dia deper aggradare a totu sos sardos chin coro e intragnas de sa zenia nostra.
Di creo chi su problema cunsistat in sa sudditantzia culturale e economica chi ( nos)faghet intender inferiores a sos ateros (italianos).Sa debilesa benit costoida esaltende sa roba furistera, faeddende in limbazu furisteri, costoinde limba, abitudines e istoria propria chirchende de si “amalgamare” cun d’etnia dominante. Est una maladia -patologia- chi culpit orma sa classe elitaria sarda e poi totu su popoli.