de Rita Pittalis –
Annos, sèculos, intollerantzia e òdiu pro sas fèminas e sos diversos
Sa Crèsia pro meda tempus est istadu solu custu!
Como b’at unu Paba, unu òmine prima de totu, bonu,de cabu, de pensamentos abertos, chi faeddat in manera simpre, no giùdicat e no si faghet Deus in terra!
Custu òmine narat chi totus ant diritu a si faghere una bida, segundu su coro e sa cussèntzia; chene ofèndere, in amore e dignidade: divortziados, omosessuales, àteos, gente de colore e pensadas diferentes.
Como deo mi pedo: est cosa possìbile chi custu òmine la penset gasi, chirchet de mudare sa Crèsia pro la megiorare e a pustis s’agatet gente “comune” chi faghet de totu pro andare a missa sa Domìniga (e totu sas àteras dies!) pro faghere bidere, a pustis, totu sa farsidade de sa fede issoro?!
<<Sas feminas (pro ite pesant sa conca e fuint dae maridos malos? Depent sufrire e abarrare sutamissas. Gasi cheret sa Bìbbia!), sos omosessuales (!) e sos divortziados (ma si narat de duos chi si cherent torrare a faghere una vida, sa birgòngia!!!), sos àteos (a ite sunt in su mundu? In ite creent ?!)>>
e àteros milli iscòticos…
Prèides, Pìscamos, Cardinales (de nùmene no de fatu!) chi refudant su chi narat su Paba dende a bìdere cantu siant bìschidos e privos de amore cristianu!!
Mai bos torrades a biere, che a su bentu, sos giòvanos. Sa gente tenet bisòngiu de paràulas de amore, no de velenu, de cumprensione, no de giudìtzios malos!!
Bene bènnida siat s’ora chi in sa trona de Santu Pedru est arribbadu Cardinal Bergoglio!
Paba Frantziscu est diversu, ca iscurtat, cumprendet, no giùdicat, si ponet in giogu. At fatu cosas chi sa Crèsia no at fatu (si podent contare in sos pòddighes de una manu!) in duamigias annos de istòria.
Bivat su Paba!! A largu passet chie cheret galu sighire una crèsia chi gente meda at cundennadu a morte pro essere tzega!!
Rita Pittalis
Leave a comment