Deus betzu in sa Sardigna de sos Annos 90 - Intervista cun Paolo Lubinu

Deus betzu in sa Sardigna de sos Annos 90 - Intervista cun Paolo Lubinu

– de Martine Faedda –

paolo

 

 

Su mundu de sa limba sarda bivet oe unu momentu particulare. Pro sa chistione pùblica ufitziale totus connoschimus sos problemas e non colat die chena denuntziare. Si però andamus a castiare ite sutzedet in sa dimensione privada b’at cosa chi nos podet finas agradessere meda. In sos social network b’at unu muntone de gente (e onni die de prus) chi iscriet in sardu e b’at finas chie iscriet òperas literàrias noas in limba, mancari a tesu dae su mundu culturale traditzionale. Tando nos at fatu praghere a beru a connoschere s’òpera de Paolo Lubinu, unu giòvanu tataresu chi est publichende in custas dies su romanzu nou suo. L’amus fatu carchi pregunta:

 

 

LS: Salude Paolo, a ti podes presentare a sos amigos de Limba Sarda 2.0?

PL: Saludos a totus. So tataresu de sàmbene ossesu e dae meda traballo in mesu a sos ambientes culturales alternativos de su Nord Sardigna, musitzista e iscritore indipendente. In su 2010 apo fundadu una rivista “Underground X“, in ue si pùblicat e promovet mùsica alternativa e eventos culturales. In cue apo publicadu sos primos contos mios “Racconti Urbani”.

LS: E como est bessende su primu romanzu tuo “Jesù Cristu ‘Etzu”. De ite faeddat?

PL:  Jesù Cristu ‘Etzu est una cummèdia corale ambientada in una bidda a curtzu a Tàtari in sos annos ’90. Su personàgiu printzipale est unu poeta banduleri, faladu dae su Monte Fenosu. Custu addòbiat àteros personàgios, sètzidos in sas panchitas de su giardinu comunale de sa bidda e custos, gràtzias a isse, leant cussèntzia e si ponent a pare contra a su podere locale. Contos de una bidda ma chi tenent sentidu universale.

LS: Amus bidu in sa retza sa presentada chi faghes a su traballu tuo. Nos at interessadu custu chi as iscritu:Riguardo all’utilizzo del sardo è bene precisare che qui si va ben oltre ogni freddo e autoreferenziale nazionalismo; qui la piena affermazione del sé emerge casomai dal conflitto con l’istituzione e dalle contraddizioni culturali e storiche esplose silenziosamente negli anni Novanta“. Ite as cherfidu nàrrere?

PL: In su romanzu b’ant personàgios chi impitant s’italianu e àteros su sardu. In sos annos ’90 custa fiat una cosa normale Difatis sos giòvanos de binti annos incomintzaiant a perdere cussu còdighe de comunicatzione, ma àteros, mancari prus betzos de pagos annos, sighiant a l’impreare. Apo cherfidu contare custu, sa sotziedade in cussos annos, chena chircare àteras chistiones. Fiat unu perìodu particulare meda, valores e ideologias cambiaiant una die in fatu a s’àtera.

LS: As fatu fintzas àteru in sardu, beru?

PL: Emmo, amus realizadu unu cortometragiu cramadu “Su cafè de tia Mantoi”, totu in sardu. Leadu dae una poesia mia, aprontadu dae su regista Ivan Pes e interpretadu dae Francesca Buffoni e Mary Jo Intermontes Cherchi. Si contat, de un abboju de duas feminas: una betza e una giòvana, in forma de bisu. E podes bidere maja, faturas, rituales antigos e figuras de s’imaginàriu sardu. Semper però cun agigu de befulania.

LS: Su romanzu cando essit?

PL: Amus aprontadu una collida de fundos pro nos pagare s’imprenta. Isperemus in atòngiu a lu bidere in sas librerias.

LS: Bene Paolo, bonauras pro totus sas atividades tuas e a bidere àteros contos in sardu.

 

poster-corto-sito

Si cherides agiuare s’autore de  Jesù Cristu ‘Etzu podides sighire custu acàpiu:

https://www.produzionidalbasso.com/project/jesu-cristu-etzu-romanzo-desordio-di-paolo-lubinu/

Inoghe podides castiare sa presentada de su libru e, dae su minutu 2:02 castiare su cortometragiu: “Su cafè de tia Mantoi”:

 

 

 

 

 

 

 

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *