Cavalcada 2015, crònaca de una die bella

Cavalcada 2015, crònaca de una die bella

de Martine Faedda –

1

 

Tocat de nos ischidare chitzo ocannu, ca mugere mia devet preparare sa bancarella cosa sua in ue bendere su chi produit: cardulinos de petza e àteros trasformados. Die de Cavalcada Sarda, sardos de totue in bestimentas de milli colores, caddos, cavalleris fieros e feminas che amàtzones.

B’at unu problema però; su maridu (deo etotu), finidu de agiuare a ammaniare su logu, ite podet faghere totu die? Tocat a pensare calicuna cosa pro nche colare ora!

Bos devides immaginare Tàtari a mangianu chitzo, cun sas rugas bòidas e pagu gente a giru. A sas sete inghitzant a arribare sos postales cun sos grupos e si nche firmant propriu a canta a sa bancarella nostra, ca b’est unu palatzu in ue ant ammaniadu sos aposentos pro si cambiare.

Colados nche sunt pagos minutos comintzant a essire sos figurantes cun sas bestimentas ispantosas chi totus connoschimus e totu in cue mi benit a conca un’idea! Mi busco unu cartelleddu grogu e cun una pinna iscrio: “Sa Limba est in su coro. Chistiona in Sardu”. Sa punna est cussa de pedire a sos grupos de faghere una foto cun cussu cartelleddu.

Paret brulla ma  non pensade chi non bi fiat unu pagu de timore, ca apo meledadu: <<ite podet pensare custa gente? Andat bene su sardu, ma no est chi ant a incomintzare sas chistiones: “e cale sardu?”, “su meu mègius de su tuo” o finas peus “ma ite cheres, chie ses?”>>

E tando boghende atza apo incomintzadu a firmare gente. Unu babbu cun su fìgiu minoreddu, duos cumpàngios caratzados, sonadores de sonete, launeddas e chiterra, feminas de una galania ispantosa a beru, grupos mannos e grupos minores. E Ìsili, Iscale-pranu, Biddamanna Strisàili, Terranoa, Sènnaru, Sossu, Casteddu, Oroteddi, Teulada, Su Masu, Tàtari, Ilartzi, Bono, Nùgoro, Tonara, Samugheo, Orgòsolo, Fonne, Sìligo, Òsile e àteras.

E cun totus sa fòrmula fiat: “salude, de in ue seis/de aundi seis? Bos la potzo faghere una foto?” Totus mi torraiant chi eja. Ma deo sighia: “Però bos la fatzo petzi si seis de acordu in su chi b’at iscritu in custu cartelleddu!” Beh! In cue sos ogros de custos si serraiant dudosos e pariat de li leghere in conca: “custu cheret dinari!” Ma lèghidu su cartelleddu sos matessi ogros s’aberiant in una grandu cuntentesa e in unu risu largu, chirchende·si unu cun s’àteru, ponende·si deretu a cara a sa màchina fotogràfica, barrosos e fieros de declarare chi, emmo!, Sa Limba est in su coro e nois chistionamus in Sardu!

Su giru, incomintzadu su mangianu chitzo est agabbadu su note in Pratza d’Italia in ue si faghent sos ballos finales. E in cue àteras fotos cun unu cartelleddu imprentadu a nou. E àteros figurantes e grupos ma finas gente comuna e turistas puru chi cheriant cumprendere ite bi fiat iscritu in cussu fogigheddu.

Nde l’agabbo cun unu contu, chi serbit finas che a resumu de custa die particulare: fata sa foto a su grupu de Fonne ando a mi nde chircare àteros. Colados 5 minutos atopu custas tres pitzinnas Fonnesas in bestimenta e las firmo: “bos l’apo giai fata sa foto, beru?” Duas de custas mi respondent riende: “eja, giai fata!” Sa de tres, chi non cumprendiat, mi faghet: “Cale foto? Deo non bi fia tandu?”, “Sa foto cun custu cartelleddu”, li naro deo mustrende·li su fògiu. Custa pitzoca, abigiada e cumpresu deretu su chi bi fiat iscritu mi faghet: “eh no! Custa la chèrgio faghere deo puru, so de acordu meda!” e cramende·si sas amigas suas: “ajò! Bois puru a faghere sa foto!”

E non potzo contare onni resonada fata cun custos amigos e amigas, chistiones fungudas e risos e allegria.

Sa morale de custa die la lasso a bois ma de seguru una cosa l’apo cumpresa:

Sos sardos sa limba la tenent in su coro a beru!

 

2

 

 

7

 

3

 

4

 

Leave a comment

3 Comments

  1. …..: <>

    Po me est istat una bella cosa e paret chi finas sa gente d’apent’apretziada meda. Saludos Pino.

  2. Est stetia una movida bona meda! Srebit cussu puru po mantennere sa limba nosta. Saludus

  3. S’ importante este a lu faeddare su resti benit a su solu

Send a Comment

S'indiritzu email tuo no at a èssere publicadu. Is campos pedidos sunt signados *