-de Sarvadore Serra –
Su ratzismu, a dolu mannu, est unu datu costante in s’istòria de sos pòpulos. B’est fintzas in s’Istadu ispagnolu, est craru. E cando tocat sos catalanos li narant catalonofobia.
Ma sos catalanos, pragmàticos comente sunt, non si la dant a coro e ant pessadu de istudiare su fenòmenu in manera sientìfica.
Issos ant creadu una Base de Dades de la Catalanofòbia (Base de Datos de sa Catalanofobia) chi includet e classìficat prus de milli episòdios de ratzismu anticatalanu dae su cumintzu de su sèculu XX fintzas a su mese de austu de ocannu. Custa banca de datos, isvilupada cun tecnologia wikimedia in collaboratzione cun sa rivista digitale VilaWeb, collit totu sos casos cuncretos de custu fenòmenu, chi essint a campu mescamente in sos mèdios de comunicatzione. Sos datos collidos permitent de bogare unas cantas conclusiones e de fàghere un’anàlisi cumparativa intre èpocas diferentes.
Sa proliferatzione in sos ùrtimos annos de sas tecnologias noas e de sas retzas sotziales faghet a manera chi internèt agiuet a ispainare messàgios de òdiu e de intolleràntzia, chi cun fatzilidade nche podent colare sa làcana de sa libertade de espressione, incuadrendeˑsi in s’artìculu 510 de su Còdighe Penale Ispagnolu, chi punit s’intzitamentu a s’òdiu.
S’importàntzia de internèt in sa propagatzione de su “discursu de òdiu” (‘hate speech’) istat in su fatu chi sa difusione in sa retza est su primu passu de sa perpetratzione de sos chi si narant “crìmines de òdiu” (‘hate crimes’), comente sunt sa discriminatzione, chi andat contra a su printzìpiu de egualidade, o crìmines violentos contra a indivìduos identificados comente membros de unu grupu.
Sos casos rilevados de discursu de òdiu catalanòfobu sunt clasificados in tres categorias: s’ “òdiu tzibernèticu”, cando si manifestat in sas pàgins informàticas e in sas retzas sotziales; sos ingiùrgios catalanòfobos, cando si tratat de decraratziones ofensivas in foras de sa retza contra a personalidades cuncretas o grupos catalanos; su discursu de òdiu in generale, chi pertocat totu sos àteros casos de discursu de òdiu elaborados in foras de internèt.
Tenende contu chi ant collidu casos dae su cumintzu de su sèculu XX, su 55% de custos sunt istados registrados in sa dècada presente e su 18% in sa prima dècada de su sèculu XXI. In prus, b’at de nàrrere chi cando sas cuntierras sunt prus mannas, comente est acuntèssidu in sos annos 30, o in sos annos 70 in su Paisu Valentzianu, su discursu de òdiu essit a campu in manera particulare. De reghente, in prus de sa cumparta ispetaculare de s’òdiu tzibernèticu, at crèschidu meda fintzas su discursu de òdiu in foras de sa retza, comente resurtadu de sa polarizatzione polìtica intre Catalugna e Ispagna.
A parte sos ingiùrgios generalizados chi medas catalanos si sunt avesados a bi cunvìvere, in custa regorta de datos b’at una anàlisi temàtica de sos elementos discursivos printzipales presentes in medas de custas manifestatziones.
Duncas, custu istùdiu ponet in craru comente su catalanismu l’ant atacadu dae positziones iperideologizadas (assotziendeˑlu a su nazismu, a su semitismu, a su giadismu o a totalitarismos diversos), o ant fatu apologia de sa violèntzia, o ant propostu s’interventu militare contra a sa Catalugna.
B’intrant fintzas sos discursos de “istrangerizatzione” (est a nàrrere, leare unu membru de unu grupu trasformendeˑlu in un’istràngiu pro sos àteros membros) de sos ‘catalanistas’, o s’invocatzione de su pantasma de sa cospiratzione pancatalanista.
Duncas podides bìdere comente sa banalizatzione de su nazismu pro iscualificare su catalanismu (26 casos) e s’invocatzione de s’impreu de sa fortza pro abrandare sas aspiratziones catalanas (18 casos) sunt sos elementos discursivos prus presentes in su custu istùdiu.
Su collegamentu nazismu – catalanismu essit a campu in sos annos 70 e l’ant impreadu a s’ispissu fintzas a s’època de su tripartidu catalanu comente forma iperbòlica de denùntzia de pretesas tentatziones espansionistas de su guvernu in s’àtera riva de su Sénia.
Sa chistione de s’impreu de sa forza contra a sa Catalugna est istadu presente in sa prima parte de su sèculu XX, mescamente in sos annos 30, durante s’eaboratzione de s’istatutu de su 1931 e sa gherra tzivile chi b’est istada a pustis.
B’at casos de apologia de sa violèntzia contra a sos ‘catalanistas’ (11 casos). Si tratat de unu discursu chi est istadu presente meda in su Paisu Valentzianu durante 4 dècadas, pro giustificare sas atziones de sos grupos blavers e de dereta estrema.
Pustis agatamus sas temàticas de s’assotziatzione intre s’iscola catalana e su totalitarismu (8 casos), comente puru sa fobia pro sa limba catalana (8 casos), ambas duas presentes meda in custos ùrtimos annos. Si sa prima est su bersàlliu de tzertos formadores de s’opinione pùblica, sa segunda est presente de prus in sas retzas sotziales.
S’assotziatzione de su catalanismu cun su sionismu (7 casos) est unu discursu bogadu a campu dae Pío Baroja a cumintzos de su sèculu XX e s’est alimentadu in sos annos 30. De reghente nd’amus tentu unas cantas mustras chi dant contu, de fatu, de sas connessiones ideològicas intre sa catalanofobia e s’antisemitismu.
Ligàmene: http://www.vilaweb.cat/noticies/el-discurs-de-lodi-contra-els-catalans-dades-i-grafiques/
Leave a comment