Armenos, su genoma issoro serente a su de sos Sardos

de Sarvadore Serra –

Ispigru istòria armena

Unos cantos genetistas ant istudiadu sos genomas de 173 armenos de Armènia e de Lìbanu e los ant cunfrontados cun sos de àteras 78 populatziones. Ant iscobertu chi sos armenos sunt unu misturu de populatziones antigas chi sos discendentes issoro como istant in Sardigna, in Àsia Tzentrale e in àteras regiones. Custu misturu s’est formadu  dae su  3000 a su  2000 in antis de Cristu.

In àteras paràulas, sos armenos tenent prus afinidade cun sos europeos de su Neolìticu (Ötzi,  3300-3100 in antis de Cristu) chi non cun sos chi como istant in s’Oriente Probianu e su 29% de su cumplessu genèticu de sos armenos forsis benit dae una populatzione antzestrale rapresentada dae sos neolìticos europeos. Sos armenos, infatis,  cumpartzint su  29 pro chentu  de s’ADN issoro  cun Ötzi, un’òmine  chi sa mùmmia sua de 5.300 annos est essida a pìgiu  in su 1991 dae unu ghiatzaju alpinu chi si fiat sorvende. Àteras  populatziones de s’Oriente probianu isuladas geneticamente, comente sos tzipriotas, sos ebreos sefarditas  e sos cristianos libanesos, cumpartzint cosa meda  cun s’Òmine de s’astra, cando chi àteros comente sos turcos, sos sirianos, sos palestinesos, cumpartzint prus pagu. Custu mustrat  chi sos armenos e àteras populatziones isuladas  sunt prus a curtzu  a sos massajos neolìticos  chi nch’ant giutu s’agricultura a Europa unos  8.000 annos a como.

Sos eventos prus antigos de misturu genèticu (carculados cun algoritmos e sestos istatìsticu/matemàticos) bi sunt istados cun europeos otzidentales e populatziones de s’ Àfrica sub-sahariana (5826 +/- 673 annos a como,   3.800 in antis de Cristu), e cun sardos e populatziones de su Càucasu (5554 +/- 362 annos a como,   3.500 in antis de Cristu. Sos armenos “ant addoviadu” geneticamente sos sardos galu una bia 4886 +/- 271 annos a como (2.900 in antis de Cristu, ammesturendeˑsi, in su matessi tempus, cun àteras populatziones: in custa rata de tempus b’est sa data traditzionale e legendària de sa fundatzione de s’Armènia, su 2.492 in antis de Cristu.

In s’agabbu de s’Edade de su Brunzu, cando custu misturitzu fiat in evolutzione, b’at àpidu  unu movimentu cunsideràbile de pessones, provocadu dae s’aumentu de su cumèrtziu, dae sas gherras e dae sa crèschida demogràfica. A pustis de su 1.200 in antis de Cristu, sas tzivilidades de s’Edade de su Brunzu de su Mediterràneu otzidentale  ant collassadu totu in unu; custa acuntèssida paret chi apat causadu  s’isulamentu  de sos armenos  dae sas àteras populatziones. Sos genetistas narant chi, dae cussa data, non s’agatat, in su genoma de  sos armenos viventes, unu misturu significativu  cun àteros populos.

Custu isulamentu est capassu chi l’apant agiuadu  sos aspetos caraterìsticos medas de sa cultura armena. Sos armenos tenent una limba e un’alfabetu particulares, e sa Crèsia Apostòlica Armena est sa prima branca de su cristianèsimu  chi s’est fata religione de Istadu, in su  301 a pustis de Cristu, antetzipende sa de s’Impèriu romanu  de su  380 a pustis de Cristu.

Sos istudiosos ant bidu fintzas  unu sinnu de divergèntzia genètica  chi s’est isvilupada unos  500 annos a como intre  sos armenos orientales e otzidentales. S’època currispondet  a su cumintzu de sas gherras  intre sas dinastias  otomana e  safavid e su partzimentu  de sa populatzione armena intre sos impèrios  turcu e persianu.

Su grupu de genetistas ghiadu dae  Marc Haber e Chris Tyler-Smith  de s’ Istitutu Sanger, a curtzu a  Cambridge in Inghilterra, bidet populatziones che a sos armenos,  chi sunt abbarrados isulados tempus meda,    comente mèdios pro ricostruire s’istòria generale de sos pòpulos.

Ligàmenes:

http://biorxiv.org/content/early/2015/02/18/015396    

http://www.nytimes.com/2015/03/11/science/study-backs-5th-century-historians-date-for-founding-of-armenia.html?_r=1

http://monteprama.blogspot.it/2015/03/gli-incontri-tra-sardi-e-armeni-5500-e.html

 

Lassa unu cummentu

S'indiritzu email tuo no at a èssere publicadu. Is campos pedidos sunt signados *

*

shared on wplocker.com